كتبت: أميرة خالد

حلت الفنانة نادية شكري ضيفة ببرنامج “الستات مايعرفوش يكدبوا” المذاع على قناة “CBC”.

كشفت الفنانة نادية شكري سبب انفصالها عن الفنان الراحل سامي العدل، مشيرة إلى أن الغيرة كانت السبب الرئيسي في الانفصال، حيث قالت:” الغيرة من أهم أسباب الانفصال.. خاصة أني كنت صغيرة لأننا اتجوزنا وخلفنا وأنا طالبة لسة.. فكنت عيلة ومكنتش مدركة الحياة،في بيت أهلي كنت مدلعة وفي مدارس فرنساوي ومش واخدة على الجو ده”.

روت نادية شكري عن قصة حبها من سامي العدل قائلة: “لفت نظري إن صوته غليظ وعرفنا بعض في خناقة وجر شكلي واستفزني وإحنا في المعهد.. وشدينا مع بعض وبعدها صالحني وبعدها الحب حصل وهو حنين أوي وقلبه طيب”.

عبرت نادية شكري عن ندمها بعد الانفصال من سامي العدل موضحة: “لو رجع بيا الزمن ما اطلقش بدليل إني ما اتجوزتش بعد منه، وأهله أهلي لحد اللحظة دي وهم سندي بعد ربنا حتى التعامل بعد الانفصال كأنهم أخواتي ومامته بتعشقني لحد دلوقتي.. ومش بيعاملوني على أني كنت مرات سامي أو أم رشا انا بالنسبة لهم حد خاص”.

تحدث نادية شكري عن ابنتها رشا قائلة:” رشا كوكتيل مني ومن والدها سامي.. وفيه حاجات مشتركة بيني وبين سامي خدتها مننا إحنا الاتنين زي الطيبة والحنية، وأنا كمان متهورة لما حد يضايقني بكون حساسة أوي فاتقلب 180 درجة أزعق على مفيش وأعيط بسهولة، وأي حد مزعلني وييجي يطيطب عليا باخد على خاطري وأفضل أعيط، لأني أنا عيوطة أوي وكذلك الجدعنة ومبزرين ما نعرفش نحوش قرش”.

قالت الفنانة نادية شكري، إنها تشارك في برنامج الفيديوهات الشهير «التيك توك» وتقدم من خلاله نصائح للبنات:” بنصح البنات من خلال البرنامج أنهم ميتجوزوش في سن صغير ودي من تجربتي الشخصية، لإن عيوب الجواز بدري اكتر من مميزاته، البنت لما تتجوز صغيرة بتبقى خارجة من بيت العيلة والدلع فتصطدم بمسئوليات كتير ومعاملة فيها غربة مع شخص غريب، فبتزعل وتاخد على خاطرها بسرعة وتعتبرها إهانة، الجواز مسئولية قبل ما يكون حب”.