كتبت: مريم يعقوب

أثارت الفنانة عواطف حلمي حالة من الجدل بسبب وجود اخبار بوجودها داخل دار مسنين تابع لنقابة المهن التمثيلية.

أعربت الإعلامية ياسمين عز، عن استيائها من الأنباء التي تداولت من قبل مستخدمي مواقع التواصل الاجتماعي حول دخول حماة خالد النبوي دار مسنين،حيث قالت:”الدنيا مقلوبة على عواطف حلمي جدة نور النبوي، وحماة خالد النبوي ودخولها دار مسنين تابعة لنقابة الممثلين، ودي أخبار كاذبة، وكم هجوم ولا كأنهم ولاد خالتها دول ناس مطلعش منهم عيب ولا بتدخل في حياة حد ولا زعلكم وعمل حاجة مسيئة انتوا قلابين وبتتوحشوا وبتنظروا”.

استطردت عز حديثها:” قلة أدب وتهزيق وسفالة ليه ياجماعة انتوا بتحرموا الناس تعمل معروف؟ دي رايحة زيارة انت مالك، هو عشان فنان نستبيح حياتهم الشخصية الناس كلها، ربوا نفسكم يا جماعة والعيال الصغيرة اللي بتغلط في العيال دي متربتش نجيب ناس تربيها، دع الخلق للخالق”.

علق الدكتور أشرف زكي نقيب المهن التمثيلية على هذه الشائعة قائلا:” السيدة عواطف حلمي عندها بيتها القديم في شبرا، وبتحبه وفيه ذكرياتها ومش بتتخلي عنه وولادها مش مخليينها محتاجة حاجة، ونور قالها نقي الشقة في المكان اللي إنتي عاوزاه، ومحدش مقصر من ولادها إطلاقًا”.

تابع: “عواطف حلمي من زمان معانا في العمل التطوعي، وأنا اللي طلبت منها تيجي دار المسنين تقعد مع الناس في أوقات فراغها، والست بتعمل ده على أكمل وجه وبتيجي من آخر الدنيا ومحدش مقصر لا نور ولا خالد النبوي والست عندها شقتها وعربيتها ولكن هي بتؤدي عمل تطوعي، ودار المسنين مكان فيه زملاء ورعاية وخدمة وتمريض وونس، لكن جملة رموك في دار مسنين ثقافة لازم تنتهي، وأنا هجتهد مع زملائي نعمل مسلسل يواجه هذه الظاهرة، أنا هجتهد مع زملائي نعمل مسلسل يواجه هذه الظاهرة، ولو نفترض إني أنا عندي والدي ومشغول 24 ساعة، أجيب حد يقعد مع والدي؟ ولا أودي والدي مكان آمن فيه ونس، المشكلة مش مشكلة فلوس المشكلة في الوحدة والعزلة، ومن سنوات كنت عايش مع أستاذ كبير لينا هو الدكتور علي فهمي كان عايش في ميدان التحرير وطلب يقعد في دار مسنين وكان فيه فنانة كبيرة رحمها الله موجودة في دار المسنين كنت بقعد معاهم قال لي عارف ليه الراجل بينسى علشان قاعد لوحده مش بيتكلم مع حد والذاكرة مش بتشتغل”.

اختتم أشرف زكي حديثه قائلًا: “أحمد زكي أحد أهم نجوم العالم، كان عنده بيت لكن كان عايش في فندق، علشان الونس والوحدة قاتلة، وسمعنا عن ناس كتير معرفناش إنهم ماتوا غير لما خبطنا عليهم، والمجتمع يا ريت يبطل القسوة على البني آدمين مش هقول الفنانين”.