كتبت: صافيناز إبراهيم
كشف الفنان دياب عن رأيه في تصريحات الفنانة إلهام شاهين عن الصلاة والتي أثارت جدلا كبيرا.
وقال دياب، عن الموقف الذي حكته إلهام شاهين وقولها أن مخرج أوقف التصوير من أجل الصلاة: «إيه المشكلة بتحصل كتير، مثلا السنة دي كنت بصور مع المخرج عمرو عرفة وقت الصلاة بنقف 5 دقايق نصلي ونرجع نكمل تصوير».
وأضاف دياب: «ساعات التصوير بيعطل ساعة ونص عشان فنانة جايه متأخر أو بتعمل شعرها أو المكيب أب مش عاجبها، بنقعد عطلانين 3 أو 4 ساعات دي أهم ولا الصلاة؟ الموضوع بسيط يعني مش محتاج، ساعات بنعطل على دلع كتير ميتحطش في الكفة مع الصلاة، اللي عايز يصلي يصلي إيه المشكلة يعني الـ5 دقايق بتوع الصلاة خلاص اليوم هيبوظ، مش هيبوظ وكل واحد ليه وجهة نظر ودي وجهة نظري إحنا مش شغالين شغلانة بنعطل مصالح المواطنين».
واختتم دياب حديثه: «إحنا ساعات بنقف عشان فنان بيعدل هدومه أو فنانة بتعدل شعرها والله ممكن نقعد ساعتين، أنا مش شايف إن فيه إشكالية».
وكان انتشر وخلال الفترة الماضية عبر مواقع التواصل فيديو قديم للفنانة إلهام شاهين قالت فيه: «أنا اشتغلت مع أحد المخرجين كان عادي وطبيعي جدا، وفجأة تدين بشكل غريب بحيث إنه في كل أذان للصلاة والكاميرا دايرة يسيب الكنترول والممثلين وينزل، ولازم العمال كلهم ينزلوا وراه ويقف إمام يصلي بهم كل صلاة، خلص المشهد وصلي في أوضتك، لكن تعطل الأستوديو كله ده عمرنا ما شوفناه، ده التغيير اللي حصل في المجتمع»».
يذكر أن دياب شارك في بطولة مسلسل «مليحة» الذي عُرض بدراما رمضان الماضي، وشارك في بطولته كل من ميرفت أمين، سيرين خاص، أمير المصري، أشرف زكي وكوكبة من النجوم، من تأليف رشا الجزار وإخراج عمرو عرفة.
كما شارك دياب في بطولة فيلم «السرب» من بطولة أحمد السقا، منى زكي، قصي خولي، شريف منير، دياب، ومجموعة من ضيوف الشرف منهم آسر ياسين ومحمود عبد المغني وكريم فهمي وأحمد حاتم، ومن تأليف عمر عبد الحليم إخراج وأحمد نادر جلال، وإنتاج سينرجي.
أحدث التعليقات