كتبت: أميرة خالد
وجه المطرب أحمد جمال رسالة إلى الشباب حذرهم فيها من الانسياق وراء الدعوات المنتشرة عبر منصات التواصل الاجتماعي لفتح الحدود.
وكتب أحمد جمال عبر صفحته الرسمية بمنصة “إكس”: كلمة للشباب الصغير اللي انا حاسس بيه و متفهم الحماس اللي عنده تجاه اللي بيحصل في غزه و من متابعتي لكل البوستات و الاقتراحات و الأراء الكتير اوي دي عايز اقولكم احنا عندنا جيش وطني مخلص فاهم كويس اوي و دارس المخطط اللي نفسهم يحققوه من زمان و عارف ان الاستفزاز المتكرر و جر رجلنا للحرب ده عشان يخلص على اقتصادك و يستغل الظروف الصعبة الي احنا فيها دلوقتي اوعى تفكر ان قيادات جيشك مش فاهمين المخطط”.
وأضاف: “اوعى تفكر انهم مستنيين البوست بتاعك بتاع افتح الحدود و اضرب و رد و ادخل حارب دلوقتي بالعكس هو بيتعامل بحكمة و بعقل عشان اللي فشلوا يحققوه بـ«سد النهضة» من تحت و«داعش و ليبيا» من الغرب و«ارهاب و داعش سيناء» من فوق و «تفجير كنايس و مساجد» و«الفتنة الطائفية» قبلهم من الداخل و غيرها و غيرها من المخططات انت هتنجحهم انهم يستنفذوك في حرب هما دلوقتي بيفرضوها عليك و مش بس هما ده امريكا و حلفاءها ساعتها هيبقوا بيحاربوا ضدك انت مش هتحارب اسرائيل لوحدها”.
وتابع: “اللي عايز اقوله ان قرار الحرب قرار كبير و اذا ماكانش برغبتك و في التوقيت اللي انت تحدده مش هما هتبقى الخساير اكبر بكتير. ثق في جيشك – ثق في قيادتك – خليك في ضهر بلدك و حبها زي ما بتحب الخير لجيرانك و قبل كل ده ثق في ربنا اللي حامي مصر و حامينا من كل اللي فات ، معقول مش هيحمينا من كل اللي جاي؟”
يذكر أن آخر أغنيات أحمد جمال كانت “أنا اشتريت”، التي طرحها عبر قناته الرسمية بموقع يوتيوب، وهي من كلمات مصطفى حدوتة، وألحان أحمد جمال، وتوزيع كلوبيكس.
أحدث التعليقات