خلافات الفنانين عرض مستمر علي القنوات الفضائية.. رافعين شعار حق الرد والهجوم متاح

ميار الببلاوي تهاجم ياسر جلال لم يساعدني في فترة من الفترات كانت أحتاج فيها إلى عمل وتخلى عني

حلت الفنانة آيتن عامر ضيفة عبر برنامج العرافة و التي تقدمها الإعلامية بسمة و هبة وكشفت أن الفنانة منة فضالي غضبانة منها حيث قالت:” والله عاملة لي بلوك ومش فاهمة ولا عارفة ليه واستغربت جدا، لقيت حد بعتلي بوست حاجة بتضحك هي مشيرها بدخل على اللينك لقيت الصفحة مقفولة طلعت صفحة منة فضالي”.

ردّ شيخ العرافين على آيتن موضحا:” منة فضالي غضبت منك بسبب الفيلم الذي شاركت معا فيه، وذلك بسبب ترتيب الأسماء”.

قامت عامر بالرد قائلة:” طبعا أسمي أنا الأول، ايه اللي يزعلها في كده؟!”.

تحدثت الفنانة منة فضالي، عن اكتشافها لـ «بلوك» الفنانة أيتن عامر، وعلاقتها الشخصية بها وذلك عبر «عرب وود»: «آيتن عامر أنا معملتلهاش بلوك، بل بالعكس هي اللي عملالي بلوك، وأنا أكتشفت دا لما دخلت أباركلها على حاجة، لقيتها شايلة نفسها من عندي».

أضافت فضالي: «هزعل منها ليه هي معملتليش حاجة علشان أزعل منها، أنا أخر واحدة ممكن يكون عندها مشاكل نفسية ضد حد تاني، ممكن أنهاردة تغلطي فيا أو تزعليني، أقصي حاجة ممكن أعملها أني معبركيش، لكن مليش دعوة بيكي أو أن أنا أقعد أغلط فيكي، أو أحطك في الحسبان».

ريم البارودي وريهام سعيد

حلت الفنانة ريم البارودي ضيفة في برنامج «العرافة»، مع الإعلامية بسمة وهبة، وكشفت عن تفاصيل خلافها مع ريهام سعيد.

ظهرت البارودي في فيديو مقتضب طالبت فيه مسئولى صفحات السوشيال ميديا المهتمة بنشر أخبارها وجمهور متابعيها بعدم الانسياق وراء أي أزمات أو الرد على أحد في أي خصومة.

وبثت ريم الفيديو على صفحتها الرسمية على موقع التواصل الاجتماعى إنستجرام وقالت” أرجوكم ما تردوش على المرضى النفسيين والحرب اللي بتتعمل عشان ريم البارودى بتقدم برنامج شارع النهار مع ريم البارودى على قناة النهار الفضائية.. أرجوكم ماتردوش وما تزعلوش وما تضايقوش.. عشان إذا خاصم فجر.. وكل واحد بياخد على قد نيته.. خلينا نرد بشغلنا.. بحبكوا قوي”.

ونشرت الإعلامية ريهام سعيد تسجيلات صوتية مسربة من ريم البارودى تعاتب فيه أحد الأشخاص لدفاعه عن ريهام سعيد.

كتبت ريهام سعيد “حسبي الله لا إله إلا هو عليه توكلت وهو رب العرش العظيم ..اللهم نور بصيرتنا جميعًا.. الشماتة والمعايرة بقله الرزق.. إخس بجد إخس”.

وتحدثت ريم البارودي عن خلافها مع الإعلامية ريهام سعيد، قائلة: «ما زال فيه قضايا بيننا ومفيش عداوة تيجي بعدها محبة، واللي يقول كده يبقى كداب واحنا بنمشي ورا أمثال غلط، دي أمثال قديمة دي مينفعش يبقى فيه كره وفي عداوة وأنا بأذيكي وأنا بكرهك وبعد كده تيجي المحبة عمرها ما تيجي محبة، لكن في محبة ييجي بعدها كره وتيجي عداوة».

هاجمت الإعلامية ريهام سعيد زميلتها بسمة وهبة بعد تصريحات الفنانة ريم البارودي مع الأخيرة في برنامج “العرافة”.

نشرت ريهام سعيد صورة تجمعها ببسمة وهبة- عبر حسابها بـ”إنستجرام”- وعلقت عليها قائلة: “في ناس ممكن يدوسوا عليك وعلة سمعتك ويصمموا انهم يشوهوكً عشان يطلعوا على كتافك… عيش وملح طظ… دخول بيوت بعض طظ. جدعنة والصورة دي تشهد طظ المهم الترند… الفلوس والفساتين مش بتعمل بني آدمين.. في هذا الشهر الكريم ومن كل قلبي حسبي الله ونعم الوكيل.. بجد عيب”.

ميار الببلاوي و ياسر جلال

خلال لقائها في برنامج “هي وهما” عبر قناة “الحدث اليوم” شنت الفنانة والمذيعة ميار الببلاوي هجوماً حاداً على الفنان ياسر جلال مؤكدة أنه لم يساعدها في فترة من الفترات كانت تحتاج فيها إلى عمل وتخلى عنها،حيث قالت:” كنت لسة لابسة الحجاب ووقتها ماديًا ومعنويًا كنت محتاجة اشتغل، طلبت من ياسر جلال أشارك في عمل معاه، وقالي أنا مليش دخل في اختيار الممثلين في المسلسل، أنا صعقت من رده لأني أنا ممثلة وعارفة إن النجم ليه حق اختيار، أنا مش واحدة من برا”.

تابعت الببلاوي: “المرة اللي بعدها لما بعتله رسالة رد قالي أنا اللبيس وأنا عارفة إنه تليفونه، هو مش عايز يساعدني مع أنه من أجدع الشخصيات لكن الشهرة بتغير، إحنا كنا بنقسم اللقمة مع بعض أنا وهو ورامز جلال”.

رد الفنان ياسر جلال، على تصريحات الفنانة ميار الببلاوي الأخيرة من خلال برنامج «الراديو بيضحك»، مع الإعلامية فاطمة مصطفى، المذاع على الراديو 9090، قائلا: «هي مشكورة وليها كل الاحترام، كلمتني في التليفون، وفي آخر المكالمة قالتلي أنا عايزه أمثل، وفي الوقت ده أنا كنت بصور مسلسل الفتوة، وقالتلي إنها عايزه تمثل معايا، وإن المسلسل مناسب لظهورها بالحجاب، أولا الأدوار كانت متسكنة بالفعل، ثانيا أي نجم محترم ملوش إنه يتدخل في اختيار الممثلين، ده شغل المخرج».

حورية فرغلي و طليقة حسن شاكوش ريم طارق

دعت الإعلامية بسمة وهبة السيدة ريم طارق طليقة مطرب المهرجانات حسن شاكوش تستضيفها في برنامج«90 دقيقة» على قناة المحور لتتحدث عن تفاصيل طلاقها من حسن شاكوش.

أكدت ريم طارق، أنها اكتشفت خيانة حسن شاكوش لها، وقالت «كنا في نهار رمضان، كان في ممثلة مشهورة عندها مشكلة صحية تالت حرف من اسمها ر راح أكل معها في شاليه بالعين السخنة، ولما رجع البيت، كتبت له: (إنت وصلت يا حبيبي)».

أضافت طارق: «قعدت 30 يوم في رمضان أشوف حاجات زي كده ومختلفة، وفي وقت من الأوقات الفنانة دي حبت تسمعني صوتها، كانوا مع بعض وقعدت تضحك».

خرج حسن شاكوش عبر بث مباشر على صفحته الشخصية فيسبوك للرد على تصريحات طليقته ريم طارق والتي وجهت له من خلالها اتهامات بالخيانه وفعل اشياء افقدتها ثواب شهر رمضان قائلا:” مساء الخير يا جماعة، يمكن من ساعة الحوار ما خلص ومن آخر فترة أنا كتبت فيها وقولت إني هسكت ومش هحكي أي تفاصيل عن إنسانة كانت في يوم من الأيام عايشة معايا ومراتي احتراماً للعِشرة واللي كان بنا”.

أعربت الفنان حورية فرغلي عن الإستياء بالتشهير باسمها في أزمة المطرب حسن شاكوش وزوجته ريم طارق، وذلك عبر برنامج “90 دقيقة” الذي تقدمة الإعلامية بسمة وهبة.

ردت الفنانة حورية فرغلي على هذه التصريحات في تصريحات صحفية لها قائلة: “والله عمري ما شوفت حسن شاكوش، ولا أعرفه شخصيًا، وتابعت تصريحات طليقته إن ثالث حرف من اسمها (راء) مش حورية بس ما فيه شيرين؟، أنا أصلا مبصاحبش أكيد مش هعرف راجل متجوز”.

تابعت فرغلي قائلة: “مع احترامي لشاكوش أنا مش بتاعت الكلام ده، وآخري صداقة ولو الموضوع انتشر بالشكل ده هرفع قضية تشهير”.

حورية و نزار الفارس

أثار موضوع خطوبة حورية فرغلي والإعلامى العراقي نزار الفارس و ذلك في شهر مايو ٢٠٢٣ جدلا واسعا على مواقع التواصل الاجتماعي خاصة بعد انتشار فيديو ترقص فيه برفقة الإعلامي ليظهر كلا منهما فى الإعلام ليوضح موقفهما.

ظهر نزار الفارس، فى نهاية الفيديو وهو يطلب يد حورية فرغلي وقال لها: أنا بتقدم ليكى على الهواء مبروك عليكى أنا”، وكان رد فعل حورية فرغلي: “مبروك عليك أنا”.

نفت الفنانة حورية فرغلي، ما تم نشره على مواقع التواصل الاجتماعي، بأنه تم خطبتها على الإعلامي العراقي نزار الفارس، مضيفة أن الإعلامي بعد أن أجرى لقاء معها نشر صور على مواقع التوصل الاجتماعي وكتب عليها ““أنه سيتزوج مني”.

قالت حورية فرغلي، خلال مداخلة هاتفية ببرنامج “حضرة المواطن”، مع الإعلامي سيد علي:” فوجئت بأن الجميع ييكلمنى وأبويا وأمى بيكلموني يستفسروا عن حقيقة الصورة التي نشرها نزار الفارس،أنا لم أتحدث معه بعد الصورة ما نزلها على مواقع التوصل الاجتماعي لأن الكاميرا التي صورتني وأنا برقص مع نزار الفارس كانت مستخبية”.

أضافت فرغلي: “نزار الفارس بالنسبة لي أقل بكثير من إني أجيب محامي وارفع قضية، هو لم يحترم مهنته، والجمهور لما بيحب فنان أو ممثل هو اللي بيدافع عنه”.

رد الإعلامي العراقي نزار الفارس على هجوم الفنانة حورية فرغلي

عبر خاصية القصص المصورة بحساب Instagram، نشر نزار الفارس مجموعة من الفيديوهات قال فيها “مصورتهاش بكاميرا مستخبية زي ما قالت كان في 3 كاميرات تليفزيون بتصور والبرومو هينزل وهتشوفوا واحنا بنرقص وفي 3 كاميرات بتصورنا”.

اختتم نزار الفارس ” انتي سنين بتعاني من التنمر وبتتنمري على طولي وأنا اطول منك، تتنمر من عانت من التنمر لسنوات”.

ميار الببلاوي و الشيخ محمد ابو بكر

حلت الفنانة و الاعلامية ميار الببلاوي ضيفة ببرنامج العرافة للإعلامية بسمة وهبة و في الجزء الثاني كشفت الببلاوي العديد من أسرار حياتها الشخصية و منها عدد مرات طلاقها من زوجها الحالي،حيث قالت:” اتجوزت أربع مرات على سُنّة الله ورسوله، ومبحبش أتجوز في السر، وزوجي الأخير اتطلقت منه 11 مرة ورجعنا تاني، وهو أول حب في حياتي ولو كان استمر في حياتي مكنتش هتجوز أي حد تاني، وعندنا عدم تجانس في الدم مينفعش نخلف، وأنا كنت عايزة أخلف فاتجوزت غيره”.

علق الشيخ محمد أبوبكر، أحد علماء الأزهر الشريف، على حديث سابق لميار الببلاوي، التي قالت خلاله: «اتطلقت من زوجي الأول 11 مرة بسبب رغبتي في الإنجاب»، قائلا: «الخطب والبرامج الدينية ممكن تشتغل ساعات طويلة، لكن ساعة واحدة من فيلم ممكن تهدم قيم أمة لـ30 سنة قدام، مكنتش حابب أتكلم، لكن بعد أن تكلمت الأخت ميار الببلاوي عن أنها اتطلقت من زوجها 11 مرة وكانت بترجع بمكالمة ولجأوا لمحلل، فهي أعادت للذاكرة فيلم عادل إمام اللي كان فيه محلل وبدأ الناس تتكلم، والبعض بدأ يحتال على الشرع ويلجأ لهذه الطريقة».

تابع ابو بكر : «إبراء لذمتي، الإسلام بريء مما قالته ميار الببلاوي شكلا وموضوعا، كلامها لا يمت للدين بصلة، مضيفا: «ربنا جعل الطلاق 3 مرات مش 11 مرة، وجعل المرة الثالثة حاسمة وفاصلة،هل ينفع لما يتطلقوا 3 مرات يرجعوا ويتفقوا مع واحد ويكتبوا على ورق؟، لا يمكن ذلك وهذا احتيال وزنا ولا يصلح، ولو اتجوزت وبيتت النية إنها تزهق الراجل ده علشان يطلقها فلا يصلح».

تابعت ميار الببلاوي: “خلاص ارحموني اعترفت بغلطتي بس أنا صاحبتي دعتني لبرنامجها وأنا بحب بسمة ومن زمان وصورنا قبل رمضان بأسبوعين وأنا اقسم بالله عمري ما شفت برنامج العرافة دا قبل كده اللهم حلقة شاكوش ومراته، وعارفة بسمة طيبة وبتحبني فوجئت بالكاركتر اللي كانت متقمصاه في البرنامج كان كل همي احافظ على هدوئي واحترامي للمكان وارد على أى سوال بصراحة علشان المصداقية”.

واختتمت ميار الببلاوي كلامها: “أنا كتبت لأني مخنوقة من الكومنتات وفي النهاية أنا طلعت في برنامج على فضائيات محترمة على قناة كبيرة مش طلعت في شقة مشبوهة تعبت كفاية استحلفكم بالله متسيبوش اللي عمله واللي قاله الشيخ وتمسكوا في غلطة أنا معترفة بيها وبحكم شغلي كمذيعة بعرف اسأل كويس بس بجد معنديش ملكة الرد ومش هقدر أوعدكم إني لو اتطلبت ضيفة في أي برنامج هرفض لأن دا شغلي بس حياتي الشخصية خط أحمر.

شيرين رضا وعمرو دياب وعبير الشرقاوي

حلت الفنانة شيرين رضا ضيفة على برنامج “العرافة”، الذي تقدمه الإعلامية بسمة وهبة على قناة النهار، حيث تحدثت عن كواليس انفصالها من الفنان عمرو دياب، بعد زواج استمر لمدة ثلاث سنوات.

أكدت الفنانة شيرين رضا أن انفصالها عن “الهضبة” تم “لأن الحياة أصبحت ما بينا مستحيلة وكنا بنتخانق، عشان كده قررنا الانفصال وإننا نفضل أصدقاء على إننا نكمل والمشاكل تكبر بنا، ومنقدرش نبص في وجه بعض. أنا كنت صغيرة عندما التقيت به، وكان يحبني، لذلك استخدم كل الوسائل للتقرب والزواج مني”.

أضافت رضا : “عمرو دياب جري ورايا علشان يتجوزني، كان صريح في البداية ونزل على ركبته، وتاني يوم جاب عربية نقل مليانة ورد، ودخل على بابا غرفة نومه وطلب منه يتجوزني ، كان قمر ولذيذ وعجبني وكان بيحبني، جوازنا استمر ثلاث سنين، والفترة دي الأغاني اللي بيقدمها، كانت ليا لأن مكنش يقدر يغني لغيري كنت أدبحه”.

تحدثت عن الغيرة وأكدت أن “الغيرة مش بتوجع غير صاحبها، أنا اتجوزت واحد مشهور لازم يكون عنده معجبين، لو غيرت عليه، مين دي وبتكلم مين أنا اللي هتعب في الآخر، وكده كده هيفضل حواليه نسوان ،أنا باسميهم نسوان، لأن اللي تجرى ورا راجل متجوز بالأسلوب دا تبقى نسوان، مش ست، لأن الستات محترمة”.

عرض البرنامج تصريحا منسوبا للفنانة المعتزلة عبير الشرقاوي، انتقدت فيه نور عمرو دياب قائلة: “إذا بليتم فاستتروا وما تفعله نور مقزز إلى أبعد الحدود”.

عقبت شيرين رضا قائلة: “مريضة نفسيا، لما تعمل عقلها بعقل بنت صغيرة وتشتمها، تبقى فاضية ومريضة، وطالما اعتزلت الفن تقعد في بيتها وتلم نفسها، وطالما اتحجبت عيب تقول الكلام ده،نور تعمل اللي هي عايزاه، هي هتتحاسب مكان نور؟ خليها في نفسها وملهاش دعوة ببنتي”.

سعد الصغير و بوسي

فتحت الفنانة والمغنية بوسي، النار على الفنان سعد الصغير، خلال استضافتها ببرنامج “العرافة”،حيث قالت إنّ سعد الصغير تدخل بينها وبين والدها من أجل ركوب التريند، مشيرةً إلى أنها لا تستبعد أن يكون أحد دفعه لذلك: «كان عاوز يركب التريند على قفايا، ومستبعدش عن سعد أي حاجة».

أضافت بوسي:” سعد الصغير أخد شقى وشقة ودهب أرملة أخيه المتوفي اللي كانت على ذمته واداهم لواحدة تانية مكنتش على ذمته، هذه السيدة التي خدعها سعد الصغير صديقتي من قبل أن تتزوج أخيه ورفعت ضده قضية في المحاكم حتى تحصل على حقها”.

أوضحت بوسي، أنها لم تكن تعتقد أنه سيذهب إلى والدها، لأنها لا تتابع ما يحدث: “راح لأبويا من ورايا، ومصر كلها اتكلمت بعد ما الحلقة نزلت، ووالدي وقتها مكنش محتاج وكنت ببعت له وإخواتي كانوا معاه وأخي حي يرزق وكنت ببعت له فلوس”.

هاجم الفنان سعد الصغير، المطربة بوسي بعد طلاقها من رجل الأعمال هشام ربيع، مؤكداً أنها تزوجته من أجل أمواله، وطالبها برد مبلغ 200 ألف جنيه ثمن الأدوات المنزلية التي أخذتها من الشقة التي كان يسكن فيها والدها قبل وفاته، مؤكداً أنها ليس لها الحق في أخذ مستلزمات الشقة لأنها ليست ملكًا لها.

قال الصغير في تصريحات صحافية: “كنت جايب طلبات لأبوها ومفروشات بـ200 ألف وبعد وفاته أخدت بوسي الشقة بما فيها لأن الشقة كانت ملكها، وقالت لإخواتها دفعت الفلوس لسعد الصغير وأنا مخدتش ولا مليم”.

استكمل الصغير قائلًا: “أنا بطالب بوسي إنها تتبرع بالفلوس بتاعتي لأهالي غزة، أو تبعتلي فلوسي على الرغم من أن أهالي غزة عندهم كرامة مش هياخدوا حاجة حد نام عليها، ولكن ممكن نبيع المفروشات دي ونتبرع بفلوسها أو نجيب حاجة جديدة وأنا أكمل معنديش مشكلة”.