خرجت الفنانة أميرة أديب كاشفة عن تفاصيل معاناتها مع الاكتئاب على مدار عامين، من خلال مقطع فيديو نشرته عبر حسابها الرسمي على موقع إنستجرام، تحدثت فيه للمرة الأولى بصراحة عن أصعب فترة مرت بها نفسيًا.

تحدثت اديب قائلة:" أنا بقالي سنتين عندي اكتئاب، سنتين بقعد في السرير مش قادرة أقوم وبقوم بالعافية ودماغي مليانة بأفكار سلبية فقط لا غير وأنا البنت اللي كانت دايما شايفة الحياة بطريقة كرتونية جدا وبإيجابية وكنتوا كلكوا بتقولوا بناخد منك طاقة إيجابية".

استكملت اديب حديثها:" منظوري للحياة اختلف تماما وللأسف كان عندي أفكار وحشه أوي وكنت عايزة أوذي نفسي ودا مكانش عدم إيمان بالعكس يمكن إيماني هو اللي خلاني معملش كده ودي كانت خضة بالنسبالي لما كنت بسمع ناس كتير عندها اكتئاب مكنتش مستوعبة أو فاهمة وكنت حاسه الناس متضايقة شوية لكن إحساس الضيق العادي الناس بتحسه كتير غلط الاكتئاب بيخليك شايف كل حاجة سوداء كأنك مخنوق ومحطوط في أوضة ملهاش مفتاح وانت مش عارف تطلع كل ما حد يفتحلك الباب وتشوف نور أنت برضو شايفة ضلمة ودا أكتر شيء أنا كنت حساه، قلت لأ لكل الشغل اللي جالي وقتها أي تمثيل مكنتش قادرة أتعامل مع الناس كنت حاسه إني مكروهه وكل الناس بتكرهني والأحسن أن محدش يشوفني أي فيديو شفتوه من أغانيا لو شفتوا الكواليس كانت أنا بعيط وبعد كده أصور، كنت بزق نفسي إني أروح اشتغل وأعمل مزيكا لأن دي كانت الحاجة الوحيدة اللي بتقومني من السرير بجد، مع أني كنت بنزل الحاجات دي وبتشتم بس كنت بقول لنفسي على الأقل في شيء بيقومني من السرير والفترة الصغيرة اللي كنت بعمل فيها دا كنت بحس بطاقة مش طبيعية والفترة اللي كنت بكتب حاجات حتى لو مش عاجبة الناس دا بيحسسني أن قادرة أعمل حاجة مش شايفة الدنيا كلها سوداء ومش حاسة إني عايزة أموت".

استطردت أميرة أديب: "جزء كبير من الاكتئاب بيبقى إحساس أن أميرة القديمة اللي كنت بحبها والناس بتحبها ماتت مش هترجع تاني، أنا بنت صغيرة وفجأة حاسه أن الناس كلها قالبة عليها وبتكرهني ومهما يقولوا كلام حلو أنا مش مصدقاه فعلا حاسه إني لو مت الناس هتبقى مبسوطة، بس رجعت وابتديت أقبل شغل تاني لو في منتجين بيتفرجوا يكلموني، أنا كنت فاكرة إني عمري ما هرجع أحب الحياة وناس كتير بعدت عني وناس وقفت جنبي وفي الموسيقى اللي جايه في كلمات مكتوبة فترة الاكتئاب ودي حلاوة الفن كل جزء في حياتي متوثق".

أنهت أميرة أديب حديثها: "رحت لدكاترة نفسيين كتير وعرفت اتخطى المرحلة الحمد لله والبنت القديمة رجعت تاني ومبقتش أخاف من السوشيال ميديا بقيت بحب الحياة وبروح الجيم وبقيت أحسن بكتير مما كنت زمان وبقيت أقرب لعيلتي واصحابي ومخي اتبرمج إني أشوف الحاجات الحلوة".

قدمت الفنانة أميرة أديب في موسم دراما رمضان 2025 مسلسل عايشة الدور بطولة الفنانة دنيا سمير غانم، والذي حقق نجاح كبير.

يتعاون في بطولة مسلسل عايشة الدور نخبة كبيرة من نجوم الفن بجانب الفنانة دنيا سمير غانم وأبرز هؤلاء: نور محمود، أميرة أديب، أحمد فاضل، فدوي عابد، ماجد القلعي، عمر الشناوي، إيمان السيد، صدقي صخر، زهرة رامي، ليلي عز العرب، عبد الرحمن حسن، دهبة أبو الدهب، مصطفي الرومي، ويظهر كضيف شرف باسم موريس عدلي، بالإضافة لمجموعة أخري من الشباب.

مسلسل عايشة الدور من إخراج أحمد الجندي، وتأليف كريم يوسف وأحمد الجندي، وإنتاج محمد أحمد السبكي وشركة السبكي للإنتاج السينمائية.