أثار بوستر مسلسل لام شمسية الذي قام بتصميمه مصمم البوسترات كريم آدم اعجاب الجمهور الذي بدأ يركز في تفاصيل بوسترات شخصيات المسلسل، فهي لم تكن مجرد بوسترات عادية كل شخصية نرى خلفها رموز بدأ الجمهور يفسرها ويكتشف من خلالها الشخصيات.

أشاد الجمهور في التعليقات و التي جاءت كالتالي:" غالبا صعب إنك تلاقي نوع من البشر يكون بيجتمع فيه صفتين مبدع وجدع، والحقيقة كريم آدم يمتلك الصفتين بكل معانيهم، اللي في الصورة ده مش مجرد بوستر وخلاص، ده هوية للعمل الفني ككل، بداية من الفونت المستخدم و الخطوط و الألوان وخصوصا الأخضر ودرجاته، وطبعا تفاصيل خلفية كل شخصية و اللي قدرت أنها تخلي الناس يبتدوا يحللوها، وده معناه التأثير والقوة وجعل بوستر العمل الفني عنصر من عناصر العمل الأساسية، وليس مجرد دعاية تنتهي مع الوقت".

علق اخر قائلا:" معرفش خدتم بالكم من ده ولا لأ، وهل ده مقصود ولا لأ، لكن كل الرموز في بوستر لام شمسية تبدأ بأحرف قمرية كلها منطوقة، وكأن اللام الشمسية الوحيدة في البوستر هو السر اللي حصل ليوسف، البوستر من تصميم المبدع كريم آدم".

علق اخر مسترسلا:" بسم الله ما شاء الله.. الأستاذ كريم آدم مبدع.. وأفتخر إننا أصدقاء بل بكل فخر هو أخي العزيز".

أعرب كريم آدم سعادته بآراء الجمهور حيث قال:" سعيد جدا بتعليقات الجمهور ومبسوط مش عشان البوسترات عجبت الناس على قد نجاح المسلسل نفسه عشان أنا شايف أنه مهم جدا لكل بيت التوعية بموضوع دا حاجة مهمة ومتعملتش قبل كده في العالم العربي بشكل شبه اللي بيحصل، كنت مبسوط أن في بوستر عليه حالة نقاش".

تابع ادم حديثه:" البوستر فكرتي الأول لما المخرج كريم الشناوي حكالي على المسلسل وحبيت إني أكون جزء من المشروع دا بعد كده قرأت السيناريو وعجبني جدا وعرفت تاريخ الشخصيات واتفرجت على أجزاء من المسلسل، بدأت اشتغل وكانت الصعوبة أن موضوع حساس شبه دا ممكن إزاي نترجمة في بوستر، الأفكار الأولى كانت كلها حاجات ممكن تكون جارحة للعين فكان التعامل صعب لازم يبقى بذكاء، زي ما المسلسل مكنش في مشاهد تجرح العين بس وصل الفكرة، لازم البوستر استخدم نفس الطريقة، فكرت أن الموضوع عن الأطفال وجارح حبيت أني استخدم حاجات رمزية تقول ولكن من غير ما تخليك تشوف حاجة تضايقك، لما قريت تاريخ الشخصيات حسيت أن كل شخصية دماغها محبوسة في سجن خاص وبيتعامل بيها لوحدة، من هنا جت فكرة القفص أن كل واحد من أبطال العمل فوق دماغه قفص محبوس جواه، وحبيت أكسر التابوه بتاع فكرة أن البوستر الفردي يكون بنفس الخلفية، قلت للمخرج كريم الشناوي الفكرة وعجبته أن كل خلفية للبوستر الفردي تكون حسب الشخصية هي مرهقة أكتر لكن دا اللي عجب الناس وخلاهم يربطوا الشخصيات".

استكمل ادم حديثه:" الشغل على البوستر أخد 3 شهور منهم شهرين تجارب وشهر كان فيه التنفيذ، أنا اشتغلت كمان على كل خلفية لاسم الحلقات ودا اقتراح مني، أن اسم كل حلقة ميبقاش مكتوب على خلفية عادية لا استخدم رموز في أسماء الحلقات خاصة أنها مميزة كلها كلمة واحدة وبتبدأ بلام شمسية فحبيت أكمل اللوحة الجميلة اللي هما عاملينها".

حقق مسلسل لام شمسيه نجاحا فائقا والذي يناقش العديد من القضايا الاجتماعية المهمة.

يشارك في بطولة مسلسل لام شمسية عدد كبير من الفنانين، من بينهم أمينة خليل، يسرا اللوزي، أحمد السعدني، محمد شاهين، صفاء الطوخي، ياسمينا العبد، أسيل عمران، يارا رجب، وعدد آخر من الفنانين، من إخراج كريم الشناوي وتأليف مريم نعوم.