خرجت الفنانة زينة عن صمتها بعد سنوات من الصمت تكشف كثير من التفاصيل والأسرار عن حياتها الخاصة وعلاقتها بالفنانة شيرين عبد الوهاب وذلك خلال حلولها ضيفة بإحدى البرامج التلفزيونية.

صرحت الفنانة زينة قائلة:" أنا وشيرين عبد الوهاب أصحاب من زمان أوي من قبل ما تعمل "أه يا ليل" كنا شلة أنا وتامر حسني وأحمد سعد وشيرين وياسمين أختي ودنيا وإيمي سمير غانم، كان نصر محروس كنت أعرفه وكان عارف إني بلبس حلو كلمني قالي أنا جايب بنت جديدة صوتها حلو وطلب مني أنزل اشتري معاها لبس للفيديو كليب، أخدتها ورجعنا على البيت عندي واتغدينا مع بعض وبقينا أصحاب".

استكملت زينة حديثها:" لما بدأت تتعرف كنا بنسافر معاها، يعني مثلا عندها حفلة في لبنان أروح معاها أنا وياسمين تذاكر ببلاش ونتفسح، هي بالنسبة ليا مش مطربة ولا صاحبتي عادي، أبويا كان بيحبها وهي كانت بتحبه وفاكرة بابا مرة تعب ودخل المستشفى شيرين كانت بتيجي تقعد تحت رجله وتأكله عمري ما هنسى المشاهد دي في حياتي".

تابعت زينة حديثها:" علاقتي اتقطعت بشيرين خالص من وقت كبير قبل الأزمة اللي حصلت، حتي علاقتها بياسمين أختي من ساعة ما شيرين اتجوزت حسام اختفت تماما، إلى أن سمعت أنها تعبانة قلبي وجعني ولقيت نسرين أختي بتكلمني في التليفون وبتعيط كنا عرفنا الموضوع من ناس قريبين منها، كلمت حد وطلبت رقم شيرين عبد الوهاب وكلمتها ورحتلها كانت تعبانة صحيا عملت عملية وشالت المرارة وكان عندها الصفراء، مش الحاجات اللي بتتقال عنها، هي عملت عمليات ودخلت العناية المركزة وحالتها كانت خطر هي أهملت في صحتها".

أضافت: "لما لقيت نفسي لوحدي كلما أحمد سعد وهو أقرب لشيرين كتير، وهو مترددش لحظة هو راجل محترم وجدع".

وعن علاقتها ببنات شيرين عبد الوهاب: "إحنا إخوات من زمان وأولادها ولادي ومولودين على إيدي وولاد أختي أصحاب "مريم وهنا" وبحبهم زي ما بحب "عز وزين" وفي حفل التخرج شيرين كانت موجودة بس مش لازم تتصور عشان تثبت لحد".