اثار الفنان عمرو جمال الجدل برسالة غامضة نشرها عبر حسابه الشخصي بانستجرام مكونه من عدة صورة .

قال الفنان عمرو جمال:" أنت كده كده عمرك ما هتبقى Perfect .. أنا طول عمري بحب التفاصيل وبحب كل حاجة اعملها اعملها بإخلاص شديد ودايما عايز الحاجات تبقي "Perfect" .. وزمان كنت بتفشخر اوي وأنا بقول "أنا Perfectionist" .. لحد ما فهمت قد إيه الموضوع ده مجهد وممكن يخلص على حياة البني آدم.".

تابع جمال حديثه:" لأن الإنسان بمقدراته المحدودة بيحاول يصدق إنه ممكن يتحكم في كل حاجة .. فيضغط نفسه إنه يعمل كل حاجة بأحسن شكل يا إما ما يعملش خالص .. وبما إن محدش يعرف أصلًا إيه "أحسن شكل" .. فاللي بيحصل إننا بنأجل ونسوف أبسط الحاجات اللي ممكن نعملها دلوقتي لأننا شايفنها "مش مكتملة" ومش عارفين نصدق أن الحاجات البسيطة بتاعة النهاردة ممكن نبقي حاجات كويسة لو اتحط عليها حاجات بسيطة بكرة وبعده وهكذا". 

استطرد عمرو قائلاً:" بحس المشكلة أن أحنا كبشر محدودين مش عارفين نشوف الصورة كاملة أو متعلقين بصورة في دماغنا كلها أوهام عن "الشئ الكامل" من وجهة نظرنا .. بالنسبالي الواحد اللي مش عايز يتحرك دلوقتي عشان عايز لما يتحرك يعمل عظمة .. عامل بالظبط زي اللي سايق عربيه في طريق ضلمة وكشافات العربية منوره ١٠٠ متر بس قدامه وهو رافض يمشي عشان مش شايف باقي الطريق .. في جمله بتريحني اوي لما الحالة بتاعة ال "perfectionism" بتجيني وهي "انت كده كده مش هتعمل حاجة perfect" .. فبالتالي كل اللي في إيدك إنك تعمل أحسن حاجة تقدر عليها في اللحظة دي .. وبعدين تعمل أحسن حاجة تقدر عليها في اللحظة اللي بعدها.".

اختتم الفنان عمرو جمال حديثه قائلًا: “امشي ال١٠٠ متر اللي انت شايفهم دلوقتي وامشيهم كويس .. وصحصح كده وركز فاللي تقدر تعمله دلوقتي .. ومتشغلش بالك اوي المكان اللي انت عايز تروحه ده هيبقي "perfect" ولا لأ ..  لأن ببساطة ممكن البنزين يخلص في أي لحظة .. والسؤال ساعتها: استخدمته في إيه؟".

كانت أحدث أعمال الفنان عمرو جمال حكاية just you والتي شاركته بطولتها الفنانة تارا عماد ضمن حكايات مسلسل «كل ما تراه ليس كما يبدو» والتي عرضت الأيام الماضية عبر قناة dmc ومنصة واتشات وحققت نسبة مشاهدة كبيرة.