حل الفنان محمد خميس ضيفا بإحدى برامج البودكاست الشهيرة و فتح قلبه لمحبيه و متابعيه في بعض الأمور الشخصية و بالاخص فكرة الانجاب .

كشف الفنان محمد خميس أنه يرفض فكرة الإنجاب وأخذ القرار منذ سنوات

حيث صرح قائلاً:" أنا واخد قرار أن أنا مخلفش من زمان هو قرار يبان صادم لبعض الناس بس أنا بصراحة وأنا عارف أن الناس بتزعل مني لما بقول الكلام دا بس أنا ما بجبرش أي حد على وجهة نظري أنا شايف أن الحياة مرهقة جدا وظالمة إلى حد كبير ويعني الظروف اللي بنعيش فيها دي أصعب من أننا نجيب أحب حد لينا في الحياة عشان يعيش في هذه الظروف".

استكمل محمد خميس:" أنا عايز اعرف دلوقتي إحنا ليه هنخلف أيه الغرض؟ أنا دلوقتي هخلف علشان ايه؟ الناس كلها بتقول لك إيه عشان واحد يشيل اسمك أو تحس بإحساس الأبوة، الطفل اللي هجيبه هيعيش رحلة مرهقة جدا بتفاصيل مرهقة جدا وأنا هكون متدخل فيها بشكل كبير جدا، وهو أحب شخص ليا في الحياة هجيبه عشان يتمرمط هذه المرمطة إيه مبرر ده".

تابع محمد خميس: "أنا شايف عندنا ما يكفي من البني آدمين عشان يشيلوا الرايات بتاعة اللي قبلهم، والموضوع ده لا يخلو من شيء من الأنانية قائم على فكرة أن أنا يبقى لي حد يشيل اسمي أو حد يبقى وريث ليا".

تطرق محمد خميس كاشفا رأي زوجته في هذا القرار حيث قال:" زوجتي الحمد لله كانت متزوجه قبلي ومعاها أولاد، وأنا كان عندي تجربه سابقة وحصل فيها انفصال عشان عندنا أزمة بتبقى موجوده مع الستات عمرهم ما بيقولوا الكلام في الاتفاق زي ما هم عايزين يعملوا بجد فانت في الأول بتقول والله أنا مش ناوي أخلف، تقول اه تصدق وأنا كمان كنت بدور على حد ما بيخلفش الكلمة بتتقال كده ما هي وبعدين ايه بعد كده أنا عايز أخلف يا ست إحنا مش متفقين أنا غيرت رأيي لا غيرت رأيك إيه إحنا بنشتري جزمة".

محمد خميس تخرج من كلية طب الأسنان ثم اتجه إلى الفن وشارك في العديد من الأعمال الفنية، ومن ثم قاده شغفه إلى الإرشاد السياحي وقدم فيديوهات عبر مواقع التواصل الاجتماعي، نالت إعجاب الجمهور وتصدر الترند وأثنى عليها رواد مواقع التواصل، وأعلن قطاع الإنتاج الوثائقي بشركة المتحدة للخدمات الإعلامية إنتاج سلسلة وثائقية من تقديمه عن التاريخ المصري القديم، وعرضها على شاشة قناة «الوثائقية».

وُلد في مدينة دمنهور بمحافظة البحيرة، وتخرج في كلية طب الأسنان عام 2000.

بدأ مسيرته الفنية بالمشاركة في عدد من الفرق المسرحية، من بينها فرقة الفنون المسرحية بكلية طب الأسنان، وفرقة مركز الإسكندرية للإبداع، وفرقة الإسكندرية المستقلة للفنون المسرحية.