حرصت الفنانة راندا البحيرى على طمأنة جمهورها بشأن حالتها الصحية، بعد خضوعها لعمليتين جراحيتين خلال الفترة الماضية، مؤكدة أنها غادرت المستشفى وبدأت فى التعافى تدريجيًا.

وقالت راندا البحيرى، فى مقطع فيديو نشرته عبر حسابها الرسمى على موقع «إنستجرام»: «عايزة أشكركم جدًا جدًا على اللى حصل الفترة اللى فاتت، الحمد لله إن أنا خرجت من المستشفى، كانت تانى عملية ويا رب يا رب تكون آخر واحدة بقى، تانى عملية فى وقت قصير جدًا».

وأضافت: «شكرًا على دعائكم وعلى أمنياتكم الحلوة الجميلة، وطبعًا شفت رسايلكم وشفت قد إيه ناس كتير جدًا كانت بتبعت لى وبتكتب لى كومنتات كويسة، بشكركم جدًا، طبعًا الحياة ما بتوقفش ولازم تستمر».

وتابعت: «أنا خرجت من المستشفى من كام يوم، لسه من حوالى 3 أو 4 أيام، وابتديت أتحسن يعنى. دلوقتى أنا فى مطار القاهرة الدولى، اتحسنت نوعًا ما بشكل كبير، ادعوا لى إن شاء الله إن أنا أتحسن أكتر وما أشوفش شر أبدًا».

واختتمت راندا البحيرى حديثها قائلة: «إن شاء الله هستنى تعليقات صحابى اللى فى قطر وفى الدوحة بالذات، كلهم هنا فى الفيديو ده. رايحة أعمل حاجة كده سريعة إن شاء الله وأرجع تانى القاهرة، وأشوفكم على خير، وبحبكم جدًا جدًا وميرسى ليكم جميعًا».