أعاد الميجا ستار  تامر حسني فتح ملف الجدل الدائر حول ما يُعرف بـ“نظام الطيبات”، بعد تصاعد النقاشات على مواقع التواصل الاجتماعي، مطالبًا الجهات الصحية بالتدخل لتوضيح الحقائق المتعلقة بالتغذية السليمة.

كتب تامر حسنى عبر حسابه على «فيس بوك»: «فى ظل الفتنة الغذائية اللى حاصلة فى مصر وحديث كل الناس دلوقتى عن إيه المفيد لينا وإيه المضر هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللى مش مفيد وياريت يكون شرح مفصل يفهمه الشخص العادى من غير أى مصطلحات طبية أجنبية؟».

تابع: «أولاً الخضار أمثال الخس والجرجير وورق العنب وكل الورقيات مفيدة ولا لأ وإزاى نطمن إنها مش مرشوشة مواد تمرض الناس... ثانياً البيض والفراخ اللى فى بلدنا ناكله إزاى وإزاى نميز ونطمن إنه مش محقون وإزاى نعرفه لو محقون.. ثالثاً شرب المية بكثرة كما تعلمنا مفيد ولا لأ.. رابعاً الحليب مضر ولا كويس وإيه الصح اللى نشربه.. خامساً الأدوية لازم تتاخد ولا مش لازم ولا مش أى أدوية تتاخد!».

أستكمل حسني حديثه: «أناشد وزارتنا المصرية تعملنا ڤيديوهات حد يطلع يكلمنا بالعامية ويرد بالتفصيل وبالأدلة العلمية على كل ده وياريت يساعدنى صديقى المحترم الأستاذ الفاضل أيمن عباس بما إنه صاحب أكبر المستشفيات ياريت يطلعلنا دكاترة من عنده مختصة يعملوا ڤيديوهات ترد على كل اللى حاصل فى مجتمعنا وبناشد برضو الدكتور العظيم مجدى يعقوب يدينا من خبرته العظيمة والدكتور الكبير حسام موافى ويساعدونا الفترة دى كشعب ويريحونا من الجدل الفظيع ده، لأن محدش بقى عارف ياكل إيه ومياكلش إيه وثوابت كتير اتغيرت بين يوم وليلة...أرجوكوا متسيبوناش كده لا إحنا ولا ولادنا».

أنهى حسني حديثه : «وارجع وأقول محتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح وأنا ليه بقول محتاجين أكتر من جهة تتكلم!!؟ عشان كلنا نطابق الكلام ببعضه مع المنطق ونحكم صح».

ثمنت وزارة الصحة والسكان، الحرص والمبادرة التي أبداها الفنان الكبير تامر حسني، في التوعية بأهمية العادات الصحية، وهو ما يعكس الدور التنويري لرموز الفن المصري في دعم القضايا الوطنية والمجتمعية.

أكدت الوزارة، أن "بناء الإنسان المصري" وحمايته من الأمراض غير السارية يُعد على رأس أولويات الدولة.

وأطلقت الوزارة منذ مطلع عام 2024 دليل الرسائل الصحية للأسرة المصرية بالتعاون مع منظمة الصحة العالمية، والذي يرتكز على 6 أعمدة أساسية لنمط الحياة الصحي، وهي: التغذية الصحية المتوازنة، ممارسة النشاط البدني بانتظام، التعامل السليم مع التوتر والضغوط النفسية، تحسين جودة النوم، الابتعاد عن العادات الضارة "التدخين والمخدرات"، تعزيز العلاقات الاجتماعية الصحية.

أكدت الوزارة أن هذه الجهود لم تقتصر على الدليل الورقي فحسب، بل تمتد عبر حملات ميدانية مستمرة، وقوافل توعوية، ومنصاتها الرقمية الرسمية التي تهدف إلى تحويل هذه المبادئ إلى "ثقافة حياة" يومية لكل مواطن مصري.

ورحبت الوزارة بكل صوت مؤثر يساهم في إيصال هذه الرسائل، داعية الفنان الكبير وجميع  المبدعين للاطلاع على الدليل المتاح عبر الموقع الرسمي، والمشاركة في نشر محتواه لتعظيم الفائدة وضمان وصول الوعي الصحي الصحيح لكل بيت في مصر.