خلال استضافتها في برنامج "قعدة ستات" مع الإعلامية مروة صبري،فتحت الفنانة مروة عبد المنعم قلبها وتحدثت عن همومها الشخصية والمهنية.

قالت الفنانة مروة عبد المنعم:" أنا بتكلم مع ربنا وبقوله يارب يعني أنا نفسي اشتغل طيب أنت ليه حببتني في الفن ما أنت اللي اديتني الموهبة دي، طيب انت مش عايزني اشتغل طيب أنا راضية أنا مش معترضة على حكمك، أنا بجتهد أبقى راضية بس أنا نفسي أمثل، أديني دليل استنى وأصبر ولا وأغير المجال، أنا بحب لما ادعي اتكلم مع ربنا".

كشفت مروة عن أكثر شيء تريد تغييره في نفسها قائلة: "الحاجة اللي نفسي اتعافى منها هي التفكير الكتير والتوتر ومش بنام، أنا باخد منوم ومش بنام بنام ساعتين وأقوم، وبعمل حاجات كتير جدا في اليوم".

اوضحت مروة عبد المنعم، عن تفاصيل تعرضها للنصب من مهندس ديكور قائلة: "كنت عايشة في شقة إيجار وكان لازم أمشي خلال شهرين علشان رفعوا الإيجار أوي، وكان عندي شقة على المحارة ومكنش معايا فلوس أخلصها، وكان في مهندس ديكور عاملي حاجات غلط جبت مهندس غيره وقولته الغلط ده نشيله".

تابعت عبد المنعم حديثها:"مكنش معايا غير مبلغ صغير وقولتله كل ما تشتغل هديلك فلوس، هو اشتغل على الغلط والفلوس اللي خدها محاسبش الصنايعية ومعمليش حتى الأبواب، وقعدت في شقة من غير سقف ولا باب، وكنت بقولهم أنا عايزة أعيش، ولقيت في مبلغ كبير أوي عليا واضطريت آخد قرض علشان أسدد، أنا معنديش راجل اتسند عليه، واللي عندي هيخاف أقوله أنا عايزة فلوس، والناس خبطت عليا قالولي الحمام بينقط قولتلهم قسما بالله ما هعمل حاجة، حسبي الله ونعم الوكيل، عشان شايفين أني لوحدي مفيش حد هيقدر عليهم".

كان آخر أعمال مروة عبد المنعم مشاركتها في مسلسل "بقينا اتنين" وعرض في رمضان 2024.

شارك في بطولته شريف منير، رانيا يوسف، ميمي جمال، يوسف عثمان، نانسي هلال، تامر فرج، طارق عبد العزيز، مروة عبد المنعم، عمر طلعت زكريا، ياسر الطوبجي، وعزت زين، عزة لبيب، والعمل من تأليف أماني التونسي، إخراج طارق رفعت، وإنتاج كريم أبو ذكري، بالتعاون مع المتحدة للخدمات الإعلامية.