تحدثت الفنانة دنيا سمير غانم عن شخصيتها وذكرياتها مع أسرتها، وذلك خلال استضافتها فى برنامج «ABtalks»، الذى يقدمه الإعلامى أنس بوخش عبر منصات التواصل الاجتماعى.

وقالت دنيا سمير غانم: «أنا بخاف أوى من الانتقادات، وبخاف أوى الناس تحكم عليّا، وخاصة فى الزمن اللى إحنا فيه والسوشيال ميديا، بقى فى ناس كتير مش حقيقية، وبحب أبقى فى الجانب الآمن».

وعن طبيعة شخصيتها وحياتها داخل الأسرة، أوضحت: «أنا بحب أقعد على الكنبة وأتفرج على أفلام أبيض وأسود، وبحب كل حاجة بسيطة فى الدنيا. وبيتنا كان طبيعى جدًا، وعائلتنا الحمد لله متماسكة جدًا، وكل العادات والتقاليد الشرقية عندنا، لكن هما نفسهم أهلى طلعونا برضه كده، معندناش غير الفن، مش بنتكلم فى البيت غير عن الفن، وبنحب الفن حب غير طبيعي».

وتابعت: «أمى هى اللى سمتنى دنيا، وبابا عجبوا الاسم وحس إن أنا دنيا جديدة عليه، ده المعنى، وطفولتى كانت خطيرة ومختلفة، ووالديّ كانوا أب وأم رائعين، وكل ما بكبر كمان بعرف قد إيه هم تعبوا جدًا إنهم يوازنوا بين شغلهم اللى عملوا فيه بشكل حلو أوى وسابوا فيه بصمة كبيرة أوى، وبين تربيتهم لينا أنا وإيمي».

وأضافت عن علاقتها بالفن منذ طفولتها: «الفن ده كان عندنا حاجة مهمة أوى فى طفولتى، إن إحنا كنا نشغل الأفلام ونحفظ الأغانى، وكنا بنحب التمثيل جدًا».