أثار الفنان الشاب طه دسوقي، ضجة واسعة عبر مواقع التواصل الاجتماعي خلال الساعات القليلة الماضية بعد منشور له هاجم خلاله التغطية الإعلامية للمناسبات الخاصة بالفنانين وتجاوز الحدود الشخصية للفنان خلال هذه التغطية.

نشر طه دسوقي منشورا قائلا فيه:" معروف إن الفنان أو العامل في مجال الـ show business، بيبقى شغله إنه بيقدم محتوى، وهو الوحيد اللي يقدر يتكلم عنه ويتسأل فيه ويتقبل النقد اللي عليه.. فمفهوم وجود التغطية الإعلامية أو التواجد الإعلامي في كل مراحل المحتوى ده، سواء أثناء تصويره أو أثناء عرضه أو أي حاجة تخصه زي المهرجانات وحفلات التكريم والعروض الخاصة".

استكمل دسوقي حديثه:" من إمتى بقى أصبح الفنان "كبني آدم" هو نفسه محتوى؟ يعني ليه فيه تغطية إعلامية ماشية مع الفنان ده في مناسباته الشخصية سواء بقى فرح أو عزا، والأدهش حتى الدفنة؟، وليه يبقى فيه محتوى عنوانه "شاهد فلان بيجوّز بنته"، "فلان والدته توفّت"، "شاهد معازيم فرح فلان"، "شاهد انهيار الفنانة"... ليه والله؟".

أضاف طه دسوقي: "ليه شاهد الفنان وزوجته أثناء حضورهم فرح صديقه؟، إيه المحتوى في بني آدم ماشي في الشارع مع مراته أو بيحضروا مناسبة ملهاش أي علاقة بفن؟.. إيه الصحافة في تصوير واحد قاعد بيبكي على حد فقده؟ مش قاعد بيصوّر مشهد مثلًا، إيه السبق الصحفي في تصوير جثمان؟ وليه أصلًا تصوير جوه المقابر؟.. طبعًا مش كل حد رافع تليفونه بقى صحفي، لأن الصحفيين المحترمين مبيعملوش كده.. ده ياخدنا لسؤال تاني... معلش".

تابع طه قائلا:" لو نزلت رفعت التليفون وصورت واحد قاعد مع مراته على ترابيزة في مطعم، هيقوم يكسر عضمك، لأنك بالنسباله متحرش أو متطفل.. لكن لو اللي بيتصوّر ده فنان، فاللي بيصوره - وارد يكون صحفي - “يا عم وانت راجل محبوب، سلّم على جمهورك واعملنا باي وانت بتاكل، وقول لمراتك تعملنا باي كمان، ولا إنت مغرور ولا إيه؟ يا عم من تواضع لله رفعه".

أنهى طه دسوقي منشوره قائلا:" سؤالي لأصحابي الصحفيين وأساتذتي في مجال الصحافة والإعلام: لما أبقى ماشي في الشارع أو بحضر مناسبة ملهاش علاقة بالشغل، وألاقي حد بيصورني ڤيديو، أتعامل معاه إنه صحفي ولا متحرش؟".

يذكر أن طه دسوقي عُرض له مؤخرًا مسلسل ولاد الشمس بطولة أحمد مالك، محمود حميدة، فرح يوسف، مريم الجندي، غادة طلعت، إخراج شادي عبدالسلام، كما طُرح له في موسم عيد الفطر السينمائي فيلم "سيكو سيكو" إخراج عمر المهندس، بطولة عصام عمر.