- كارول سماحة تقف بقوة إلى جانب عزيز الشافعي ضد الهجوم الممنهج
- «سفن دوجز» يكتسح شباك التذاكر في العيد ويتخطى 25 مليون جنيه في أول أيامه
- شاكيرا تحسم الجدل: لا مكان للعلاقات العاطفية.. العائلة والعمل أولًا
- أحمد عصام يضيء سماء ختام مباراة مصر وروسيا بعرض فاير وركس مبهر
- هيفاء وهبي تُشعل الأجواء بأغنية جديدة «شو المطلوب؟» احتفالًا بعيد الأضحى
- نور الغندور تتألق بفستان قصير ومجسم في أحدث جلسة تصوير احتفالًا بالعيد
احدث الاخبار
هاي ميوزيك فن
عزيز الشافعي ينفجر بعد الهجوم على «بحرية»: حملة ممنهجة واتهامات أصابتني نفسيًا
رد الفنان عزيز الشافعي على الهجوم الكبير الذي تعرض له بعد طرح أغنية «بحريه» الدويتو الذي جمع الفنان محمد حماقي والفنانة شيرين عبد الوهاب
وظهر عزيز الشافعي في فيديو عبر صحفته على Facebook قال فيه: «أغلب الناس أخدت بالها من حملة هجوم شديدة تعرضت لها خلال 3 أسابيع فاتت حبيت أطلع أتكلم وأفضفض معاكم شوية، بدأت الحملة دي وإحنا بننزل مع شيرين عبد الوهاب وعودتها للجمهور بأغنية «الحضن شوك» الناس هاجمت الأغنية وليه شيرين بتغني درامي كده وبعدها الأغنية نجحت وبقت رقم 1».
وتابع عزيز الشافعي: «بعد كده عملنا أغنية «تباعا تباعا» وهي مش أغنية درامية هي أغنية رومانسية جميلة وبرضو بدأ حملة هجومية شديدة جدا على الأغنية في أول 3 أيام تريقة وسخرية واستخدام اللغة العربية والمفعول المطلق حاجات كتير ضحكتني مضايقتنيش أوي لكن رغم حملة الهجوم الممنهجة دي الأغنية نجحت نجاح كبير وحققت أكتر من 20 مليون مشاهدة على يوتيوب ونجاحها سكت الناس اللي كانت بتهاجم الأغنية وبتهاجم عودة شيرين عبد الوهاب مع عزيز الشافعي وبدأت أحس أن الحملة دي ضدي أنا شخصيا».
وأضاف: «أغنية «بحريه» بان فيها أوي أن في قصد واضح للاغتيال المعنوي لعزيز الشافعي والقضاء على النجاح المستمر سنوات كتيرة وتوهج جدا في رمضان اللي فات بأغاني كتيرة زي «مش حبيبي بس» وغيرها، الأغنية نزلت أول امبارح، لسه محدش سمع حاجة الناس بدأت تشتم في الأغنية اللي لسه منزلتش، بسأل نفسي إيه اللي ورا الهجوم دا وليه الناس تهاجم أغنية زي «بحريه» بالقسوة دي وفي ناس وأنا آسف كان في غل في الهجوم، أنا في الآخر عملت أغنية وجهة نظر وطريقة جديدة للفلكلور وحكاية لطيفة بين بنت عايزة حبيبها يجي يتقدملها زي أي ديو دمه خفيف اتعمل زمان زي أغاني شادية وعبد الحليم حافظ ومحمد فوزي وليلى مراد، حكاية لطيفة لا فيها إسفاف ولا فيها إساءة ولا فيها حاجة ضد الدين ولا حاجة سياسية تخلي طريقة الهجوم والكره والحقد دا على شخص اسمه عزيز الشافعي هجوم متواصل وللأسف الهجوم اللي كان ممنهج في الأول دفع ناس كتير تانية أنها تتأثر بالكلام دا وتنشر الهجوم ضد الأغنية وضد عزيز الشافعي».
وأكمل عزيز الشافعي: «أنا بتكلم معاكم عشان أدافع عن نفسي كواحد معملش حاجة عمل أغنية، واحد بقاله 20 سنة بيحاول يخلق مشروع فني قدر ينجح وقدر يوصل للناس بنجاحات كبيرة مع أكبر النجوم الحمد لله وقد يوصل لمكانة الناس عارفينها ويبدو أن بعض الناس مستكترنها، لا هي حصلت عن استحقاق وحصلت بعد كفاح مرير لأكتر من 20 سنة وعشان كده بدافع عن نفسي وعن المشروع بتاعي وشايف أن دا مش بس عزيز الشافعي المفروض يعمله لا كل الناس المهتمة بالفن والإبداع والجيد والخروج من القوالب الجامدة والأغاني، في بعض الزملاء قليلين جدا للأسف شاركوا بتلميح أو بتصريح أو كلام اتقال من ورا ضهري وللاسف وصلي وبقولهم مش زعلان ودا يمكن رد فعل غير مقصود وأنا واثق أن الأغلبية الكاسحة من الناس اللي اشتغلت معاهم حبيتهم وحبوني ومش شايلن لي غير كل خير».
وتابع عزيز الشافعي: «الفيديو دا أنا عامله في الأساس عشان الناس اللي أنا بحبهم والمتابعين اللي بيحبوني اللي اتأثروا بالكلام وعيلتي أولادي وبناتي وكل الناس اللي بتحبني وزعل أن عزيز الشافعي بيتقال عليه كلام بالقسوة دي، وحتى المحامي بتاعي قرر أن هو ياخد إجراءات قانونية لبعض الإساءات وأنا مش عايز أعمل كده بس للأسف لازم دا يحصل لأن في سب وقذف، أنا نبهت عليه أن يفرق بين النقد والرأي والإساءة اللفظية، في كل الأحوال أنا سعيد بنجاح أغنية «بحريه» و»تباعا تباعا» ومسامح الناس في الهجوم اللي بعد كده اتقلب لحب للأغنية لكن أكيد مش مسامح الناس اللي بيعملوا حملة ممنهجة عشان يأذوني هما فعلا أذوني نفسيا لكن كلام الناس اللي معرفهاش اللي بيبعتولي يقولولي أوعى تزعل كان زي البلسم على الجروح والطبطبة على القلب وبحمد ربنا أن دا من دعوات أبويا وأمي الله يرحمهم وأنا في الآخر هقدم الفن اللي عايز أقدمه وهعمل تجديد، طول ما في مطربين كبار عندهم الموهبة والجرأة أنهم يكسروا القوالب الجامدة، وكل اللي حصل هيتنسي قدام نجاح الأغنية».
الكاتب
التعليقات