أثارت الفنانة فريدة سيف النصر حالة من الجدل بعد انتقادها بعض الأفكار المطروحة في دراما رمضان 2026، معربة عن استيائها من طريقة تقديم العلاقات العاطفية بين السائقين أو أفراد الأمن والفتيات داخل بعض الأعمال الدرامية و بالاخص مسلسل و ننسى اللي كان.

نشرت سيف النصر منشورا عبر حسابها الشخصي بالفيسبوك قائلة:" لاحول ولاقوة الا بالله.. مش عايزه اتكلم بس ما قدرتش.. يا جماعة ما ينفعش اجيب مثلا أمن أو سواق مع بنتى يحافظ عليها والاقى الأمن داخل غراميات مع اللى بيحرسها وبنتها عند ابوها وسواقها بيزعق لها وغيران”.

استكملت سيف النصر : “يعنى بتفهموا اللى بيشتغلوا يعملوا ايه بالظبط، اه كلنا ولاد تسعة بس كده غلط احنا بنفتح عينين على حاجات تودى فى داهيه، نمشى الناس اللى جايبينهم ونجيب ستات ولا نهبب ايه ده كلام والمفروض البنت تصارح أهلها وماتسمحلوش يكلمها كده”.

تابعت فريدة قائلة : “هو المفروض جاى يبلغ ابوها بأى حاجة.. احنا ها نخيب ولا ايه.. طبعا الكلام ده تمثيل فى مسلسل أنا شخصيا بحبه وبحب نجمته جدا ومؤلفه وكلهم بس برضه مش كده احنا مش اجانب وانا كأم ولى حفيدتين ما ينفعش يلاقوا ده عادى علاقات وصداقة مع جارد أو سائق وغيره وحب وايه الكلام الفاضى ده”.

أنهت فريدة سيف النصر حديثها:" اللى عندنا بيقلدوا الوحش قبل الكويس.. ربنا يستر على ولادنا والله ونرجع نلوم على السواقين.. ياريت ماحدش يزعل من صراحتى.. وانا مش عنصرية لكن مش لازم ننسى أن فى اصول... ملحوظة.. كمان فكرة المساكنة عند الكدوانى قومتنى من على الكنبة قفزا والله.. هاكتبها لوحدها”.

في المقابل، أشادت الفنانة فريدة سيف النصر بمسلسل هي كيميا، مشيرة إلى إعجابها بالطابع الكوميدي الذي يقدمه العمل.

وأثنت على الثلاثي دياب ومصطفى غريب وميشيل ميلاد، مؤكدة أن الكيمياء بينهم تمنح المشاهد جرعة من الضحك بعيدًا عن أجواء التوتر والانتقام التي تسيطر على بعض الأعمال الدرامية.