كشف المخرج  محمد دياب عن مفاجأة تتعلق بمسلسل "أشغال شقة جداً" الذي يُعرض الجزء الثاني منه خلال الموسم الرمضاني، وهو من تأليف شقيقيه خالد وشيرين، ومن إخراج خالد دياب.

كتب محمد دياب منشور طويل عبر حسابه على منصة فيسبوك، ليسرد رحلة خالد وشيرين دياب، قائلاً:" الحمد لله أشغال شقه للسنه التانيه ينجح نجاح ساحق، بس ورا النجاح ده قصه".

استطرد دياب حديثه:" اشغال شقه ده لمده خمس سنين بيتعرض علي منتجين مصر كلهم ولكن مكانش فيه حماس ليه، تقريبا معظم ممثلين مصر رفضوه رجاله وستات، ولما مره نجم كبير تحمسله ومضاه فضل يطلب تغييرات لدرجه إنه في الآخر طلب إن شغل البطل يتغير وتتشال فكره الشغالات! في ناس مكانتش عاجباها الفكرة وناس كانت شايفه اننا بنكتب جد فمش هنعرف نعمل كوميدي، وناس عايزه الفكره بس اللي يخرجها حد تاني غير خالد".

تابع محمد دياب:" رد الفعل ده كان هيجنن خالد وشيرين، احساس صعب لما تبقي مؤمن بحاجه واللي حواليك مش شايفنها، ساعات ده بيشككك في نفسك، أربع سنين تعدي ومينزلش لخالد وشيرين أي مشروع، الضغط خلي خالد يقبل ان اشغال شقه يتعمل ولو بمخرج تاني، خالد لأي حد يعرفه هو اكتر انسان كوميدي تقدر تعرفه وأنا وشيرين كان عندنا قناعه انه من اشغال شقه هيطلع كوميديته الخاصه اللي هتكسر الدنيا، بصعوبة شديدة رجع خالد وشيرين يحاولوا ورا المسلسل، لغاية لما جه هشام ماجد اللي آمن بيه وبخالد كمخرج وجت شركة الإنتاج (آي برودسيرز) اللي هيأتله أسباب النجاح، أشغال شقة" نجح واستخدم توليفة كتابية مختلفة مش قايمة عالإيفيهات، وخالد كمخرج طلع عنده صوت وشخصية ورؤية بصرية باينة في كل مشهد، أنا طول عمري بتفرج علي كوميديا المسلسلات وابتسم كام مرة وأبقي مرضي، بس إن الواحد يضحك بصوت ولغاية لما بطنه توجعه وده يحصل كل حلقه، فمتخيلتهاش تحصل في مسلسل".

تابع دياب قائلا:" بالنسبالي المخرج والمؤلف الشاطرين هما اللي بيعملوا حاجه أحس إني معرفش أعملها وأنا لما بتفرج على "أشغال شقة" ببقي متأكد اني معرفش اعمل منه مشهد، فعلاً كل تأخيره وفيها خيره".

تدور أحداث المسلسل في إطار كوميدي عائلي حول الزوجين "الدكتور حمدي" و"ياسمين"، وما يتعرضان له من مواقف سواء مع أبنائهما، أو في العمل.

والعمل من بطولة هشام ماجد، أسماء جلال، مصطفى غريب، محمد عبد العظيم، شيرين، سلوى محمد علي، أحمد عبد الوهاب، حازم إيهاب، محمد محمود، وأحمد الرافعي، فضلاً عن مشاركة عدد من ضيوف الشرف مثل آية سماحة، ناهد السباعي، نسرين أمين ودنيا ماهر.