شن مطرب المهرجانات مسلم هجوما حادا ضد الفنان مصطفى كامل و نقابة المهن الموسيقية حيث نشر منشورا شديد اللهجة عن طريق ستوري عبر حسابه الشخصي بانستجرام.

قال الفنان مسلم:" هما عادي ممكن يسيبوا حد يبوس واحدة على الاستيدج وبعد كده يفرشوا الأرض ورد ليه ويستقبلوه أحلى استقبال، وعادي يسيبوا حد يقول إيحاءات في الأغاني وعادي محدش برضه يتكلم، وعادي يسيبوا حد يقول كلام في أغاني يخلي العيال الصغيرة تعور بعضها".

تابع مسلم حديثه:" وكل دول ما يتحاسبوش وأنا اللي أفضل قاعد سنة بدون شغل عادي جدا بس أقولك إيه هيا دي الواحد لما يكون معاه سلطة بيدوس على أي حد ويطلع يتكلم باسم الفضيلة وإنه راجل عادل وعمره ما ظلم حد حسبي الله ونعم الوكيل نقابة مش عادلة".

نفى مسلم كل ما زعم حول تنظيمه وقفة احتجاجية أمام مقر النقابة حيث قال:" بعد ما روحت النقابة وحليت مشكلتي مع الشركة اللي كنت مرتبط بيها، وكان أملي أرجع أشتغل، لقيت إن الأمور اتعقدت تاني، وفوجئت إن الفرقة بتاعتي بتكلمني وبتقولي أمشي، وناس من الصحافة والفرقة بيتكلموا عني إني بعمل احتجاجات قدام النقابة، وأنا مش بتاع كده ولا عندي وقت، كل همي أشتغل عشان عندي أمي وعيالي ومسؤولياتي".

أضاف مسلم قائلاً:" قررت أسافر وأسيب البلد، هبيع كل حاجة في الشقة وأصفي كل حاجة، بدل ما أعيش هنا ومش عارف أشتغل. أنا بقالي سنة مش بشتغل واتظلمت من كل حاجة… أهل وناس ومنتج ونقابة. المحكمة سمحتلي أشتغل، بس في ناس بتوقف كل حاجة بالواسطة والرشاوي. خلاص مش قادر أحلم في بلدي ، شكرًا لكل واحد وقف جنبي، وشكرًا كمان للّي كان بيتمنى أشوف يوم صعب. ربنا كبير وقادر يجيبلي حقي".

خرج الفنان مصطفى كامل نافيا تصريحات مسلم حيث قال:" ما يقوله مسلم كذب، أنا بعتبرهم ولادي لكن كل ما قاله كذب أنا من يوم ما دخلت النقابة من 3 سنين بعاملهم زي ولادي قلت نحتويهم، مشكلة مسلم من اليوم الأول ليا في النقابة كان بيقولي أنه مظلوم وأنهم بيبتزوه، أديته الكارنية عشان يشتغل ومن أول 10 أيام كان فيه 40 شكوى، لدرجة إني قلت له أنا جبت لنفسي جريمة لما دخلتك النقابة".

استطرد كامل حديثه:" الشكاوى مكنتش كيدية كانت حقيقية ولما كنا بنحقق كان يقول أصل أنا عيان، إلى أن جاءت شركات كبيرة اشتكت أن هو ماضي عقد وملتزمش بيه، حققنا معاه وأخدنا قرار الإيقاف، مسلم جالي بيتي وقعدت معاه من شهر ونص وقلت له روح خلص كل الأمور مع الشركات ووقت ما يجيب مخالصة من الشركات دي هينزل الشغل تاني يوم".

أنهى كامل حديثه حول الوقفة الاحتجاجية قائلاً:* كنت في مشوار مهم جالي تليفون أن في وقفة احتجاجية الطبيعي أكلم الشؤون القانونية عشان يتخذوا اللازم، وهو بيقول كلمت ابنه هو ابني هيحللي في النقابة أنا لا بدخل ابن في تحقيق العدل، طالما الأمور وصلت لكده يتواصل مع الشؤون القانونية".