رد الفنان آسر ياسين على الانتقادات والتعليقات السلبية التي كتبت عبر مواقع التواصل الاجتماعي بعد لقائه في بودكاست "حوارات مع عباس" مع الفنان عباس أبو الحسن وحديثه عن الصعاب التي واجهها في بداياته الفنية.

أوضح آسر ياسين أن ما نشر عبر مواقع التواصل الاجتماعي هو جزء من حديثه فقط، وأن هذا الأمر أصبح رائجا بسبب صفحات تبحث عن التريند.

قال آسر ياسين خلال لقائه مع إحدى القنوات: "للأسف في دلوقتي صفحات كتيرة جدا بتمسك جزء من الانترفيو وتلخصه في جملة معينة ويبتدي يتحور منها الموضوع، الناس بتتكلم عن "الفراخ والجمبري" ومعندوش غير دا كمعاناته يعني، شكرا للناس اللي اختصرت دا كله في الحتة دي بس مش دي الرسالة ورا الموضوع دا ووالله لو كانت معاناتي "فراخ وجمبري" يبقى أنا محظوظ جدا بس برضو مش دا اللي كنت بقوله خالص وأنت مدوقتش الفراخ والجمبري اللي أنا قلتهم متعرفش تفرق أصلا بين الفراخ والجمبري".

تابع آسر ياسين: "الحمد لله على كل شيء، أتمنى الناس تشوف الانترفيو وتقيم هي بنفسها بعيدا عن فكرة أننا نلخص الحاجات، ودا مش بيحصل معايا أنا بس بيحصل مع الناس كلها".

اختتم آسر ياسين حديثه: "عشان الناس تبقى عارفة في صفحات كتيرة جدا مبنية على "ترافيك" أن هو يمسك حاجة من أي انترفيو ويبتدي يحورها بشكل ما عشان يعمل فلوس الموضوع بالنسبة ليا فاسد، اللي عايز يمشي مع دا يمشي واللي عايز يسمع الانترفيو يسمع".

كان آسر ياسين حكى خلال لقائه بـ"حوارات مع عباس" عن بداياته الفنية قائلا: "أنت رايح لوكيشن تصوير ومحدش يعرف عنك أي حاجة وفاكر أنك هتبقى عمر الشريف اللي جاي، في أوضة فيها 15 واحد كلنا قاعدين اللبس بيترمي كده قدامك ألحق ألبس محدش عرفك لسه، طيب أنا عايز أكل في البريك تروح تقف على عربية البريك ويقولك في "جمبري أو فراخ" وبعدين تطلب جمبري ويقولك مفيش غير فراخ".