أعرب  المطرب اللبناني وائل جسار عن استيائه من مستوى بعض الأغاني التي تطرح هذه الفترة موضحا أنه لا يقصد فنان بعينها ولكن يتحدث عن مستوى الفن عموما.

صرح جسار في مداخلة هاتفية لإحدى البرامج:" أنا حريص على الفن والكلمة الحلوة واللحن الجميل بتكلم من هذا المنطلق لأن إحنا وصلنا لمرحلة خطيرة جدا مش عارف إيه اللي هنخليه للجيل القادم، إحنا اتربينا على أغاني العمالقة واتسلطنا عليها من حيث الكلمات واللحن، كان في أغاني شعبية وسريعة بس كان ليها قيمة لكن حاليا في أغاني هابطة جدا".

استكمل جسار:" أنا قلت كله هيهاجمني ويقول أن دماغي قديمة لكن لحرصي على الفن العربي واجب علينا كلنا كفنانين وشعراء وملحنين نحارب هذه الآفة اللي إحنا موجودين فيها، أنا قلت قبل كده مش غيرة من أي حد كل واحد وليه جمهوره، لكن غيرة على الفن، الأغاني بقت تعتمد على الترند وأن اسمنا يظهر أكتر".

شدد وائل جسار أنه لا يقصد أي شخص بكلامه وعن سؤال  إن كان يقصد عمرو دياب قال: "عمرو دياب دا الهضبة وكل الوطن العربي بيقلده أنا مش بتكلم عنه، أنا مشفتش أغنية "لولا البنات" سمعت كذا أغنية منها "الألوان" بحبها هي بونبوناية بس بالنسبة ليا مقبلش إني أغنيها لأنها مش لوني، الفنان لازم يكون متنوع اه لكن في حد أدنى وحد أقصى في فنانين معيين وصلوا للحد الأقصى للكلام الركيك واللحن".

استرسل جسار حديثه:" مش بقصد أي حد بكلامي ومفيش حد في دماغي أنا بتكلم بشكل عام، كل فنان مبيقدمش فن حلو أنا ضده، وربنا يوفق أي حد بيعمل الأغاني دي هما ليهم جمهور ويمكن بيحبوا الستايل دا، أنا مش بتكلم غير على الناس اللي بتغير من أعمالها وتعمل أغاني عشان شهر نبقى "ترند" أنا بالنسبة ليا كوائل جسار بقدم فن حلو مش عارف إذا في عليا انتقاد أو لأ لكن بنظر كتير من الناس أنا بقدم فن أجيال قادمة ممكن تسمعه، لكن الحاجات اللي بنسمعها مؤخرا كارثة بشكل عام".

كشف جسار عن رأيه في الفنان أمير عيد وما يقدمه مع فريقه "كايروكي" حيث قال: "مين دا والله ومش تقليل منه معرفوش، أتمنى محدش من جمهوره يزعل لكن بصراحة مش عارفه".

انضم النجم اللبناني وائل جسار إلى قائمة نجوم إحدى شركات الصوتيات والمرئيات، الذين تم التعاقد معهم لتقديم مشاريع غنائية جديدة خلال المرحلة المقبلة، تليق بتاريخهم الفني.

ووقّع الفنان وائل جسار عقدًا فنيًا مع الشركة، لاستكمال مسيرة تعاونات جديدة ومثمرة مع نجوم يمتلكون قاعدة جماهيرية كبيرة.

وأوضح وائل جسار أن هذا التعاون سيثمر، بلا شك، عن أعمال قوية تُضاف إلى تاريخه الغنائي، وتليق بجمهوره ومحبيه في جميع أنحاء الوطن العربي.

وكشف جسار عن بدء تجهيز وتسجيل مجموعة من الأغاني، ضمن التعاقد، على أن يتم إطلاقها قريبًا.