حرص الفنان أحمد العوضي على توضيح حقيقة ما أثير مؤخرا حول تصريحاته، التى أطلقها خلال استضافته مؤخرا بأحد البرامج التليفزيونية، وذلك فى فيديو عبر حساباته على مواقع التواصل الاجتماعي، والتي فُسرت على أنها تشبيه للنساء بالسيارات، مؤكداً أن كلامه جرى اجتزاؤه وتداوله بعيداً عن سياقه الصحيح.

شارك العوضي فيديو عبر حسابه الشخصي بالفيسبوك موضحا فيه: «شوفت امبارح اللى حصل وقلت معملش الفيديو دا إلا بعد ما أكتب البوست الأول، طبعا أنا شوفت امبارح الناس اتكلمت وقالت العوضى قال وعاد وزاد وشبه إيه بإيه، والكلام دا عارى تماما من الصحة وانا لما كتبت البوست الاعتذار لقيت ان الكلام ممكن يروح في حته تانية أو يمس اشخاص أنا بحترمهم فنزلت اعتذار عن لو الكلام اتفهم غلط لكن أنا أصلا مقولتش حاجة».

استكمل العوضي حديثه:«أنا الحلقة ساعة 38 دقيقة قولت فيها كلام كتير جدا وحريص جدا فى كل كلمة بقولها وعارف أنا بقول ايه عشان محدش يقولى لا انت عارف وانت قاصد ويدخلوا في نيتى وكله مش حقيقى الموضوع ان الراجل كان بيسالنى فى ان الذكريات الجديدة ممكن تنسيك الذكريات القديمة وانا قولتله ان كل مرحلة ليها ذكرياتها الخاصة، بقول كل مرحلة ودى بتشمل السكن أو حد فى حياتك والسيارة اللى جبتها من الشغل انا وسعت المعنى وضربت مثال بالعربية واتكلمت بشكل تلقائى ولو قاصد أى معنى سوء مش هجيب سيرة أبويا وعربية أبويا وذكرياتى معاها أنا مش بالغباء دا».

أضاف العوضي قائلاً: «الموضوع اللى نزل على السوشيال ميديا نزل مجتزأ وإني جبت مرسيدس وبتاع وانا مش بالسذاجة اللى تخلينى اشبه السيدات بالعربية أو التشبيه الدنئ دا لان أنا فى الآخر عندى خالة وعمة وبنت خالة وبنت عمة فاكيد أنا مش هغلط الغلط دا، لكن اللى عايز يتصيد هيتصيد».

وتأتي تصريحات أحمد العوضي بعد موجة من الانتقادات التي طالته على مواقع التواصل الاجتماعي، بسبب تفسير البعض لحديثه باعتباره يحمل إساءة أو نظرة انتقاصية للمرأة، وهو ما نفاه الفنان بشكل قاطع، موضحا أنه لم يكن يقصد توجيه أي إساءة للسيدات.

وعلى المستوى الفنى يواصل أحمد العوضى تحضيرات مسلسل سلطان الديب الذى يخوض به منافسات موسم دراما رمضان 2027، ويشارك فى بطولته سوسن بدر ورانيا يوسف ويارا السكري ولجين خليفة ومحمود البزاوي ويجرى التعاقد مع باقى الفنانين المشاركين فى البطولة، والعمل من تأليف محمود حمدان وإخراج محمد عبدالسلام وتدور أحداثه في اطار شعبي اجتماعي مليء بالصراعات.