حسم الملحن هيثم نبيل الجدل المثار حول أغنية «كنا صغيرين»، التى طرحها الفنان ضمن ألبومه الجديد، مؤكدًا أن الأغنية ليست نسخة من عمله السابق، وإنما تعتمد على لحن مختلف من ألحان الملحن الراحل.

وكتب هيثم نبيل عبر حسابه على «فيسبوك»: «منعًا للغط وكلام كتير بيتبعتلى النهاردة سواء من جمهور أو من صحفيين، هى فعلًا أغنية «كنا صغيرين» بتاعتى فى ألبومى الأول «كملنا بعض»، ده مش تشابه، لكن ده لحن مختلف غير لحنى اللى كنت عاملها بيه».

وأضاف: «الموضوع إن فنانين كتير حابين يخلدوا ذكرى أخونا الغالى محمد رحيم، فبيسمعوا أغانى من خلال زوجته، وصادف إن الأغنية دى من أرشيف أغانى رحيم الله يرحمه اللى منزلتش، وهو كان لحنها زمان قبل ما أنا أخد الكلام وألحنها وأنزلها فى ألبومى الأول».

وتابع: «أنا شايف إن ده هدف محترم من صديقى رامى جمال، وخصوصًا إنى اتفاجئت إن المؤلف توفاه الله، وأنا أكيد سعيد إن ألحان محمد رحيم تفضل موجودة بينا. مبروك يا رامى الألبوم وإن شاء الله يكسر الدنيا، وربنا يرحم محمد رحيم والشاعر خالد أمين».

وأكد هيثم نبيل انتهاء الأمر بشكل ودى، قائلًا: «رامى تواصل معايا والموضوع حصل بمنتهى الود، وعشان مش حابب إن حد يصطاد فى الماية العكرة، إحنا فى الآخر بنقدم فن يبسط الناس مش بنحارب، وفى حاجات تانية أهم إنسانية تستدعى التجاوز عن التفاصيل الأصغر».

من جانبه، رد الفنان رامى جمال على هيثم نبيل، قائلًا: «شكرًا حبيبى إنك فهمت الموقف وليك كامل الاحترام، وهى غلطة غير مقصودة من ورثة الغالى رحيم، والحمد لله إنها جت مع شخص محترم زيك، ورغم كده مشيت قانونى وخدت إذن منك ومن الجمعية بإعادة النشر تانى، وكله يهون عشان خاطر رحيم وجماله وخالد وورثته، وشكرًا يا هيثم على أدبك وذوقك، مش غريب عليك».