انتقد الفنان أمير عيد، نجم فرقة “كايروكي”، ظاهرة تباهي بعض النجوم بأرقام المشاهدات التي تحققها أعمالهم الغنائية أو بعدد الحضور في حفلاتهم، حيث صرح خلال حفله الاخير قائلاً:"في حد بيقول إن حفلته هي الأكبر وهي الأضخم.. وبيقولوا إننا عملنا في ستاد القاهرة أكبر حفلة في تاريخ مصر.. لكن علشان أكون صريح، الحقيقة أنا مش بفهم ليه الناس مهووسة أوي بفكرة الأرقام الأكثر مشاهدة والأكثر متابعة.. واللي عنده أجمد عربية وأجمد ساعة.. أعتقد ده بيدل على الشخص اللي بيبقى فاضي من جوا بيحب يبقى من بره”.

استكمل عيد حديثه:" أن الحاجات الرخيصة هي أكتر حاجة بتتباع"، وأن الأرقام قد تكون أحيانًا دليلًا على الرخص، وافتكر إن أمي قالت لي إنك عمرك ما تبقى شخص غني إلا لو كان عندك حاجة الفلوس ما بتشتريهاش.. ودلوقتي السوشيال ميديا بتحسسنا إننا مش عايشين وبنشوف ناس عاملة نفسها مبسوطين وفرحانين.. ودي مش ناس حقيقية لكن أنتم ناس حقيقية".

تابع عيد حديثه:" ناس كتير وأنا في الطريق طلعوا لي التذاكر من العربية وهما بيسلموا عليا، وكلهم كان فيهم حماس شديد جدًا.. والموضوع عمره ما كان بالعدد، الموضوع في الروح اللي هما بيدوهالنا. حتى لو الحضور النهارده كان نص العدد أو حتى 10 أشخاص، كنت هبقى فخور وهعمل نفس الحفلة بالضبط. المهم مش كام.. المهم القيمة مش بالكم، المهم بالقيمة".

أنهى عيد حديثه قائلاً:" أنا بعمل الأغاني اللي بحبها مش علشان أكون براند أو سلعة.. أنا مش كيس شيبسي علشان أبقى نفسي أبيع أكتر حد. أنا فنان حر، واللي بيحركني أفكاري وقناعاتي. وبغني لجمهور حر عنده أفكار وبيحب يفكر. شكرًا ليكم على ثقتكم، وإنكم جمهور ملهم. زمان كنت فاكر إني بغني لوحدي في الأوضة ومحدش هيسمعني، لكن وجودكم غيّر كل حاجة.. أنتم السبب إني مش بغني لوحدي، وإن الأغاني دي تفضل عايشة، وإن أنا مش لوحدي في العالم اللي بقى تقيل ومش حقيقي.. شكرًا".