في كلمات حاسمة مثيرة للجدل حرصت الإعلامية عبلة سلامة على توجيه رسالة تحدثت فيها عن تعدد الزوجات وضرورة مراعاة مشاعر الزوجة والأبناء، مؤكدة أن السعادة لا ينبغى أن تكون سبب فى جرح الآخرين.

كتبت عبلة سلامة عبر حسابها الشخصي بالفيسبوك:" من حق أى إنسان فى الدنيا يكون سعيد ويدور على سعادته. ومن حق قلبه يميل، ويحب، ويختار الطريق اللى يريحه. دى حاجة محدش يقدر يناقشه فيها".

استطردت سلامة حديثها:" لكن لو أنت على ذمتك زوجتين، يبقى من حق الاتنين عليك العدل... مش بس فى الحقوق، لكن كمان فى إظهار المشاعر والكرامة، وأنت بتعيش سعادتك، ما تدوسش على قلب حد تانى. ما تكسرش خاطر ست كانت معاك من أول المشوار، ولا توجع ولاد كبار شايفين أبوهم وبيفهموا وبيحسوا بكل حاجة".

تابعت سلامة حديثها:" أنا مش بتكلم عن مين يقبل ومين يرفض، ومش بتكلم عن قرار أسرة أو اتفاق بين أطرافه. دى حاجة تخصهم هم، أنا بتكلم عن احترام المشاعر وعدم القسوة!..فيه زوجة ممكن عارفة بوجود زوجة تانية... لكن حاجة تانية خالص إنها تشوف ده قدام عينها كل يوم، على الميديا، فى الصور، فى الفيديوهات، مع أولاد طرف واحد بس، وكأن الطرف التانى وولاده مش موجودين ليه؟ ليه الوجع اللى مالوش لازمة؟".

أنهت سلامة حديثها:" رجالة... من حقكم تبقوا سعداء، والله محدش يقدر ينكر عليكم ده. لكن السعادة الحقيقية عمرها ما تبقى مبنية على كسر قلب حد كان يومًا ومازال جزءًا من رحلتك، وانا هنا باكلم الراجل مش الست لأنه المفروض صاحب القرار ! راعوا المشاعر... لأنها يمكن ما تتشافش، لكنها بتوجع أكتر من أى حاجة".