أعرب الفنان احمد ماهر عن رأيه في مصطلح السينما النظيفة ورفض بعض الفنانات لفكرة التلامس في الأعمال الفنية.

صرح ماهر قائلا:" أنا ضد مصطلح السينما النظيفة، أنا اتربيت تربية أكاديمية وخرجت للحياة الفنية وحتى وأنا طالب أساتذتنا خلونا نقف وسط كبار النجوم فتعلمنا منهم ما لم نتعلمه داخل الأكاديمية، أهم ما تعلمناه أن الفن رسالة وخطاب وكلمة بعيدا عن هذا المعنى ميبقاش فن، يعني حتى التهريج لا بد أن يخضع لقواعد حتى نطلق عليه فن، الارتجال له مدرسة لكن مسألة العشوائية وأن كل واحد يقول أي حاجة تعرض لخياله الفن عملية منظمة متكاملة ومترابطة ومتفق عليها مينفعش أخرج عن الإطار الذي تم الاتفاق عليه لا يشعر الزميل اللي معايا إنه خنته".

قال عن رفض بعض الفنانات التلامس في الأعمال :" مش من حق الممثلة إنها ترفض التلامس اللي ارتضى بهذه المهنة ليس هناك من محاذير زي ما بيقولوا لا حياء في الدين ولا حياء في الفن إزاي المشاهد يستشعر إن الأستاذة دي طالعة بشخصية الزوجة أو بشخصية العشيقة أو بشخصية بنت الليل إزاي لازم تقدم كل شيء".
حكى الفنان أحمد ماهر عن موقف حدث وقت تصوير فيلم "شمس الزناتي" تسبب في غضب الفنان عادل إمام منه حيث قال:" أنا وقت تصوير فيلم "شمس الزناتي" كنت بصور مسلسل "ذئاب الجبل" ومعايا أوردر "شمس الزناتي" أول يوم تصوير في استديو مصر الساعة واحدة، كنت بصور "ذئاب الجبل" في ماسبيرو والمفروض أعمل مشهد وأمشي، المشهد يبدأ 10 بالكتير هخلص 11 أو 11 ونص وعربيتي قصاد ماسبيرو هركب وأروح لهناك".

تابع ماهر حديثه:" جيت خارج لقيت الباب مقفول وعليه قفل وقالولي معلش في ديكور مهم نصوره وإلا هنتحمل يوم تاني إنتاجيا، طيب أنا عندي أوردر في استديو مصر سألوا مع مين، واتصلوا بإدارة الإنتاج واتفقوا معاهم، وقعدت كملت تصوير بناء على هذا الاتفاق، صورت وخلصت الساعة 2 ركبت عربيتي وروحت، طبعا الموقف سيء وهما فضلوا قاعدين مستنين أول ما دخلت اعتذرت وأن المسألة خارجة عن إرادتي وإن الإنتاج في ماسبيرو كلم الإنتاج في استديو مصر والكل على علم، دخلت أعمل المكياج حد جيه وقالي أن أستاذ عادل إمام زعلان عشان الموقف دا، قلت له إني اعتذرت بالرغم أن الموضوع خارج عني والإنتاج والمخرج تم تبليغهم وأنا اعتذرت للكل، قالي لأ كان عايزك تعتذر له هو لوحده، لكن أنا رفضت اعتذر له لوحده فغضب عادل إمام".