خرج الفنان عمرو سعد للرد على موجة الانتقادات لمسلسله الرمضاني سيد الناس حيث انتقده الجمهور لصوت الفنانين المرتفع حيث قال:"اتضايقنا في الأول من انقادات الصوت العالي في المسلسل و لكن بعد كده ادركنا أن مش كله حقيقي.. وبعض أصبحت تضع بند الترويج لأعمالها على السوشيال ميديا لكنني أرى أن الموضوع تخطى هذا الأمر".
تابع سعد حديثه:" إحنا معانا مهندس صوت، فيه حاجة معينة مينفعش يطلع براها، الناس العادية مش فاهمة أنها صناعة ولها أدوات ومفيش فيها حاجة غلط لازم تبقى منضبطة، وبعدين فيه ريموت وطي الصوت أو أقلب، مشوفناش زمان ناس بتعلق على الحاجات دي، مش معقول أن كل الناس تحولت لنقاد".

استطرد عمرو حديثه عن مشهد القبر قائلا:" المشهد دا مكنش موجود، أنا وقفت كدة وجاتلي الفكرة ورحت داخل على محمد سامي وقولت له (عايز افتح على الواد القبر)، قال لي (يعني إيه الكلام دا؟) قولت له (عشان أنا قولت أنا عايز اغسل ابني وادفنه، ومش هقدر اكمل ومش حاسس إني هكمل غير لما انتصر لوداعه)، محمد سامي اتخض، وقولت له (عايزك تعمل المشهد دا اتصرف)، قال لي (ما احنا عملين مشهد مؤثر جدا)، قولت له (معرفش)، وحصل نقاش غير عادي، واختلاف رهيب، هو قال (أنا مع دا)، وسألوا شيوخ في الأزهر".
تابع عمرو سعد: الأول أستاذ علي حسن مشرف الإنتاج رفض تماما المشهد، وقال: "أنا هبلغ عنكم"، أنا خفت وحصل خلاف، وبنينا الديكور وجينا نعمل المشهد حصل تراجع تاني، أنا قولت لهم أنا هعمل لكم مشهد مافيش حد من الشيوخ هيعترض عليه، لأن المشاعر هتكسر كل الكلام دا، كلموا أحد الشيوخ الكبار بدون ذكر أسماء وقال: "لا بلاش، حرام"، قولت له: (يا مولانا ما القتل حرام وبنعمله في السينما والتليفزيون، ما الخمرة حرام وبتتعمل والزنا حرام)، دا حاجة مختلف عليها، وراهنت على المشاعر، قولنا نصوره ونشوف، وحطيت ايدي على قلبي لغاية ما سلموا الحلقة لأني حطيت فيه مشاعر حقيقية، وسامي قالي مش هكتبه انت هتعمله معنديش كلام اعمله، وحصل دا، وانبسطت جدا من رد فعل المشاعر، واحد حُرم إنه يغسل ابنه ويشيله يوديه في لحظة وداعه، هو بصلابة ظاهرية عمل دا، واللحظة دي فرقت في استقبال الجمهور للأحداث اللي بعدها".
مسلسل "سيد الناس" بطولة عمرو سعد، خالد الصاوي، الهام شاهين، منه فضالي، أحمد فهيم، رنا رئيس، نشوى مصطفى، عماد زيادة وآخرين، تأليف وإخراج محمد سامي.