حل المنتج و الفنان هشام جمال وزوجته الفنانة ليلى أحمد زاهر ضيفين في أول حوار تليفزيوني بعد زواجهما، في حلقة خاصة من برنامج صاحبة السعادة مع إسعاد يونس على قناة dmc.

روى جمال عن تعرضه وزوجته ليلى زاهر لحادث تسمم خلال أيام شهر العسل، دون علم عائلتهما.

قال الفنان هشام جمال:" أقسم بالله محدش من أهلنا ولا أصحابنا يعرف اللي حصل، كنا مش عايزين نخض حد، بس اللي حصل كان مرعب بجد!".

تابع جمال حديثه:"كنا بنتمشى انا وليلى جنب الفندق و دخلنا مطعم و أنا أكلت 3 أرباع الساندويتش وليلى ربع، ورجعنا الأوتيل الساعة 1 بالليل. بعدها ليلى نامت فجأة، وأنا بدأت أحس بوجع في بطني مش طبيعي، زي السكاكين!".

استكمل جمال حديثه:" كنت بين خيارين.. يا أنزل لوحدي المستشفى وأسيبها نايمة، يا أصحيها ونعمل دوشة.. الحمد لله إنّي ما نزلتش، لأن هي كمان كانت تعبانة بنفس الدرجة!".

تابع جمال حديثه قائلا:" رحنا المستشفى في امريكا و الدكاترة كشفوا علينا و اكتشفوا أننا حصلنا تسمم غذائي احنا الاتنين والمستشفى كانت فاضية بس الناس هناك باردة جدًا! أنا بموت وهي بتجري تخلص الورق، لحد ما أدونا دواء وبدأنا نتحسن."

أنهى جمال حديثه:" كان عندنا طيارة بعد ساعات، جمعنا شنطنا وإحنا بنموت وتوجهنا للمطار، لحقنا الطيارة قبل الإقلاع بـ10 دقايق بالضبط!، ناس كتير قالت خدوا بالكم من الحسد، بس أنا شايف إن في ناس بتدعيلنا من قلبها، والدعوات دي بتشيل الشر.. الحمد لله ربنا سترها."