تحدثت الفنانة وفاء صادق عن ذكريات انطلاقها في المجال الفني، واسترجعت تجربتها المميزة في العمل مع والدها، المخرج الراحل عادل صادق، مؤكدة أن تلك المرحلة شكّلت جزءًا مهمًا من مسيرتها، وجاء ذلك خلال لقائها في برنامج "ساعة ونس"، الذي يقدمه الإعلامي مراد مكرم عبر قناة CBC سفرة.

كشفت وفاء صادق عن أول تعاون مع والدها وعن سبب طردها من الاستديو، موضحة: "اطردت من الاستديو مرة لما قلت له يا بابا لدرجة إني مستوعبتش إيه الغلط في إني أقوله يا بابا، كان من أصعب المخرجين اللي اشتغلت معاهم لأنه كان عنده حساسية أنه بيتعامل مع بنته فميتقالش أنها متدلعة أو بتشتغل عشان بنته، حتى في المعاملة كان ناشف معايا".

أضافت صادق : "بابا مكانش موافق دخولي الفن خالص لكن مش من باب أن هو مش عايز بنته تمثل هو كان شايف إني متدلعة على المهنة، لأن المهنة دي عايزة حد ملتزم وجد ويقدر يتحمل المشقة بتاعتها لأن منظرها من برا يبدو أنها سهلة، وأنا كان عليا إني أثبت له إني قد المسئولية دي".

أكملت قائلة: "أول عمل كان مسلسل "الطاووس" من إخراج بابا الله يرحمه وقدمني في 7 مشاهد، قالي هو دا اللي ليكي عندي، اثبتي أنك قد المسئولية دي، هديكي الفرصة اللي ناس كتير تتمناها وريني بقى، وبعد كده جالك شغل جالك مجالكيش أنا عملت اللي عليا".

تابعت وفاء صادق قائلة: "اتعلمت منه فنيا أنا متربية في مطبخ الشغلانة من قبل ما اشتغل أرجع من المدرسة على الاستديو، كان بيقولي أساسيات المهنة اللي هي أنا الحقيقة دلوقتي مفتقداها جدا، احترام المهنة عشان تحترمني وأديها قد إيه من وقتي واهتمامي واحترام الكبار اللي في المهنة مهم أن الممثل يبقى بيتفرج على قد ما بيشتغل، وأنا كان حظي حلو اشتغلت مع كل الكبار".