حل المخرج خالد يوسف ضيفا ببرنامج سبوت لايت و أعلن من اقترابه من الانتهاء من كتابة أحدث أفلامه السينمائية، الذي يحمل عنوان "خطوات الخوف".

صرح يوسف قائلا:" بعمل فيلم اسمه خطوات الخوف وبانتهي من كتابته، وبإذن الله قريبا أبدأ اختيار الممثلين،الفيلم بيتكلم عن تيمة الخوف في حياتنا كأهم وازع للبشر، أجدع واحد في العالم خايف، اللي خايف من المرض أو الفقر أو خايف على ولاده أو من المستقبل. كل واحد في حاجة تمس ظاهرة الخوف جواه تحركه".

تابع يوسف حديثه عن رؤيته للسينما قائلا:" فيلم ينجح مش من حيث إنه يدخل فلوس قد ما من حيث كم مشاهد شافه؟ كم مشاهد نزل وراح دخل صالة العرض عشان يشوف الفيلم ده؟ ده النجاح.. فبكل تأكيد بيهمني الإيرادات من المنطلق ده على الأقل مش من منطلق إرجاع فلوس الفيلم يعني،السينما طول عمرها عمل جماعي بيقوم بيها 120 بني آدم، مخرج وممثلين وأبطال ومدير تصوير ومهندس ديكور ومزيكا تصويرية، كل دول بيتضافروا كده عشان يقدموا عمل للناس. فما فيش يعني هو في النجم الأكبر في تاريخنا ينفع يعمل فيلم لوحده من غير ما يبقى في مخرج ومن غير ما يبقى في ممثلة قدامه أو بطل قدامه أو بطلة أو مدير تصوير أو بتاع؟ فالسينما هي الفن الجماعي يعني، الفن اللي يسميه به جماع وسائل التعبير الإنساني".

استطرد يوسف قائلا:" موجود فيه التصوير وموجود فيه الإخراج وموجود فيه المزيكا وموجود فيه الديكور وموجود فيه كل يعني موجود فيه كل الفنون".

يذكر أن آخر أعمال خالد يوسف كان فيلم "الإسكندراني"، المستوحى من رواية تحمل الاسم نفسه للكاتب الراحل أسامة أنور عكاشة، ويضم فريقا مميزا من النجوم وهم أحمد العوضي، زينة، عصام السقا، بيومي فؤاد، حسين فهمي، صلاح عبد الله، محمود حافظ، محمد رضوان، ورحاب الجمل.