حل المخرج عمرو سلامة ضيفا ببرنامج كلاكيت و أشاد بموهبة الفنان محمد رمضان قائلا:" محمد رمضان أنا بشوف دايما أنه ممثل استثنائي ومعملش أعمال سينمائية قد حجم موهبته بس هو دلوقتي بيعمل فيلم أنا متفائل بيه مع صديقي محمد دياب حاسس أنه هيبقى فيلم مهم جدا".

تحدث عمرو سلامة عن الوضع الحالي للفن قائلاً “إحنا في فترة ذهبية، عندنا مجموعة ممثلين رائعين، حب الجمهور ليهم كبير، وده لازم يترجم لأعمال أكتر في السينما، مثلًا أحمد مكي من الفنانين اللي بحبهم جدًا وكنت أتمنى أشتغل معاه على فيلم”، وأضاف “فيه ممثلين كتير ناجحين جدا في المسلسلات، ويستحقوا ياخدوا فرص في السينما كمان، إحنا عندنا خامات ممتازة”.

كشف عمرو عن امنيته قائلا:"حلم حياتي أشتغل مع عادل إمام، طول عمري واحدة من أمنياتي إني أشتغل مع الزعيم".

استرسل عمرو قائلا:" أنا اتحبست في دور الشخص المثير للجدل معرفش ليه مع أن أنا في الحياة مش كده، ومش عارف بقول إيه مثير للجدل للدرجة دي يمكن أنا غلطان معرفش مش المفروض اتكلم وأقول اللي في دماغي زي ما هو بس، أنا فاكر وأنا صغير لما كانوا يقولوا إيناس الدغيدي قالت كذا أو يوسف شاهين قال كذا وخالد يوسف قال كذا وأنا في أوقات كتير بقول هو ليه الناس متعصبة من تصريحاتهم، في أوقات كتير جدا لما بقول حاجة أو يطلع مني تصريح يعمل جدل أو يعمل خناقات أونلاين ساعات بحس أن دا مفيد وساعات لأ أنا مش مستحمله، يعني في أوقات كتير جدا بحس أنه مفيد أننا نفتح موضوع زي دا ونتناقش فيه كمجتمع ونكتشف إيه الصح وإيه الغلط وفي أوقات بحس أن المفروض تعدي ولا حد يستوقفها".

اختتم عمرو سلامة كلامه: "العصر دا مصيبته أنك طول الوقت ماشي في حقل ألغام بتقول أي تصريح في تليفزيون أو برنامج أو على النت ممكن تلاقي نفسك دوست على لغم وأنت مش واخد بالك خالص وأنت فاكر أن الكلام محدش هيقف عنده بتقول اللي جواك زي ما تكون قاعد مع صاحبك على قهوة لكن كل يوم الواحد بيتأكد أن الموضوع فاتورته غالية".

يذكر أن عمرو سلامة عرض له مؤخرا مسلسل "بريستيج"، و هو من بطولة محمد عبد الرحمن، مصطفى غريب، راندا عوض، دينا، سامي مغاوري، بسام رجب، آلاء سنان، أمينة البنا، معاذ نبيل، وعمر الشريف، إلى جانب مغني الراب زياد ظاظا و صانع المحتوى عبد العاطي بالإضافة إلى مجموعة من النجوم الذين سيظهرون كضيوف شرف في الحلقات.