شارك المخرج محمد سامي في ندوة ضمن فعاليات قمة الإعلام العربي و قام بالتعليق على  قراره باعتزال الإخراج التلفزيوني.

قال المخرج محمد سامي:" ما بعد الكمال النقصان.. المبدع محتاج كل فترة استراحة ويفكر في اللي عمله، هو وصل لإيه، وناقصه إيه، وإيه اللي هيرضيه".

استكمل سامي حديثه:" بعد ما ربنا يكرمك بالنجاح والتوفيق، لو فضلت ماشي على نفس الطريق، هتلاقي نفسك بتقل، لازم تقف وقفة مع نفسك وتشوف إيه اللي هيساعدك تكمل بشكل أفضل".

تابع سامي حديثه:" يمكن عايز أقدّم نوع مختلف من الأعمال، ويمكن في نجاح أكبر من اللي حققته، لكن دوامة الشغل مش مدّياني وقت أفكر، أي حد عايز ينجح لازم يقف مع نفسه وقفة صادقة، ويحدد هو عايز يعمل إيه الفترة الجاية".

علق محمد سامي على الانتقادات التي تتعرض لها أعماله بأنها تصور المجتمع بطريقة سلبية مؤكدًا أنه يحترم قرارات الرقابة، وأن كل شخص لديه الحرية فيما يشاهده حيث قال:" ممكن اللي يخدش حياءك مايخدشش حياء غيرك، وممكن العادي بالنسبة لك ميكونش عادي عند غيرك.. فيه ناس بتشوف أن التلفزيون حرام.. ممكن واحد يبقى شايف مشهد مسك الأيد زيادة وواحد تاني بالنسبة له البوسة أو الحضن هو اللي زيادة، إحنا كصناع بنحترم الرقابة لأني مش هروح لبيت 100 مليون عربي اسأله حضرتك ومراتك والأولاد بتحبوا إيه أنا بتبع قواعد الرقابة مش رقابة بيتك رقابة الدولة والمحطة.. أنت حر في بيتك وبما إنك حر في بيتك لو الدور الرقابي مش عاجبك في حاجة كويسة ريموت ممكن تختار منه رقابة لبيتك".

يذكر أن محمد سامي عرض له في موسم رمضان الماضي مسلسل "إش إش"، من بطولة مي عمر، ماجد المصري، انتصار، إدوارد، هالة صدقي، دينا، شيماء سيف، طارق النهري، عصام السقا، علاء مرسي، محمد الشرنوبي، ندى موسى، إيهاب فهمي، حمدي هيكل، أحمد عبدالله، وعدد من ضيوف الشرف وهم: محمد ممدوح، خالد الصاوي، كريم فهمي، محمد عبدالرحمن، أحمد زاهر، والعمل من تأليف وإخراج محمد سامي.