انتقدت المخرجة روجينا بسالى بعض نجوم موسم دراما رمضان 2026، الذين يحملون «اللجان الإلكترونية» مسؤولية فشل أعمالهم أو تعرّضها لانتقادات جماهيرية، مؤكدة أن الهجوم المتكرر على الجمهور واتهامه بتقاضى أموال مقابل انتقاد عمل فنى، يعكس حالة من إنكار الواقع.

وكتبت روجينا عبر حسابها الرسمى على «فيسبوك»: «فيه صناع مسلسل بيكتبوا بوست مكرر كل سنة: «يا جمهور، أنقذونا من اللجان!». علشان مقتنعين إن أى حد ما عجبوش العمل مأجور، لدرجة إن فيهم اللى بيشتبك مع الجمهور فى التعليقات، هو وأصحابه وعيلته».

وأضافت: «مش فاهمة الجمهور يبقى فى خصومة معاك ليه؟ لو فى ناس شايفة إن الأداء ضعيف، أو إن القصة بتتكرر كل سنة، ده حقهم الطبيعى كمشاهدين، إنك تتجاهل بقى رأى الجمهور الحقيقى، وتفرح بالجمهور الافتراضى الوهمى اللى خلقته لنفسك، ده مش نجاح ده إنكار، الناس ملت وزهقت من التكرار، والأداء الباهت المزيف، والتلقيح وقعدات المصاطب».

واختتمت روجينا: «أنا شفت مشهد من المسلسل أفتكرته AI؛ لأن مافيش حد ممكن يكتب حوار زى ده، ولا فيه ممثلين ممكن تمثل كده.. احترموا دماغ الجمهور شوية من فضلكم، وكفاية شماعة اللجان، لأن الحقيقة إن أكتر ناس بتتكلم عن اللجان، هى أول ناس بتستخدمها».

وتفاعل معاها الجمهور معبرين عن رأيهم فى الأعمال الدرامية المعروضة هذا العام؛ قائلين: «أنا طلعت لجنة عشان قولت عين سحرية حلو»، « فيه واحدة سألتنى قابضة كام لمجرد إنى اعترضت على تمثيل ممثلة ما، مع إن أى حد معدى من قدام الشاشة هياخد باله إن فيه عبث بيحصل.. هى مش الآراء دى المفروض تساعد الممثل يطور من نفسه؟ ليه مبيعترفوش بيها».

وأضاف آخرون: «دمروا سمعة ورونق الفن المصري»، «الجمهور بيحب من يحترم فكره»، «وبيزعلو قوى مكانوش كدا فى ايه للزعل دا ما يسمعوا الناس يمكن يعدلوا الغلط».