كتبت : مريم يعقوب قامت الإعلامية بسمة وهبه بتوجيه نصائح للفنان احمد سعد بعد قيام مصممة الازياء و ام اولادة السيده علياء يوسف باعلانها طلاقهما اليوم و ذلك من خلال برنامجها الشهير قائلة: "فوجئنا النهاردة ببوست نازل من علياء زوجة المطرب أحمد سعد، وهو بوست قاسي جدًا وواضح إن علياء كانت موجوعة جدًا. الست ما تعملش كده إلا إذا حد جاب ولاعة وولع لها في حتة من جسمها أو قلبها". استكملت وهبة حديثها:"عايزة أنصحك يا أحمد نصيحة اعتبرها نصيحة إعلامية وأخت وتقدير، الشهرة والنجومية والفلوس لازم تغير البني آدم وتزغلل عينيه، وأوقات ربنا يديها للبني آدم اختبار أو مكافأة للست اللي معاه وبناتك، إنت طول عمرك من أجمل الأصوات، لكن ماكنتش بنجومية وشهرة النهاردة، "نصيحتي لكل راجل عنده واحدة ست وقفت جنبه إوعى لما تعلا تديها كتف ربنا مش هيكرمك، وياما مطربين كانوا فوق في السما ودلوقتي في الأرض علشان افتروا على زوجاتهم". انهت الاعلامية بسمة وهبة حديثها مسترسلة: "علياء ساعدتك ووقفت جنبك كتير يا أحمد، خلي بالك وما تجيش على ستات مصر دول محميين بآل البيت، وأتمنى أحمد وعليا يكونوا رجعوا لبعض والشيطان اللي بينهم مشي". تصدر اسم الإعلامية بسمة وهبة الفترة الماضية محركات البحث، وذلك بعدما نشرت صورتها بالحجاب وعلقت "عزيزي الحجاب اشتقت إليك"، وهو ما أحدث ضجة كبيرة عبر مواقع التواصل الاجتماعي.