تحدثت الفنانة دنيا سمير غانم عن تجربة فقدان والديها، الفنانين الراحلين سمير غانم ودلال عبدالعزيز، وكشفت عن تفاصيل تعاملها مع الحزن بعد رحيلهما، وذلك خلال استضافتها فى برنامج «ABtalks»، الذى يقدمه الإعلامى أنس بوخش عبر منصات التواصل الاجتماعى، حيث دخلت فى نوبة بكاء أثناء حديثها عن ذكرياتها معهما.

وقالت دنيا سمير غانم: «تعاملت مع فقد والدى ووالدتى، معنديش حاجة معينة أنا عملتها، الحزن بيفضل موجود جواك، وأمر إن الوقت بيعدى فبتنسى، لا بالعكس، الوقت بيعدى والإنسان بيظل محتاج للشخص اللى فقده، خاصة لو أب أو أم».

وأضافت: «ربنا هو اللى بيعرف يخليك تكمل، وهو اللى بيديك القوة، والإنسان مفروض إنه يشغل نفسه طول الوقت. فى الأول مكنتش بقعد مع نفسى ولا ثانية بعد فقد والدى، ولحد دلوقتى، ومفروض الإنسان يشغل نفسه طول الوقت وميحطش نفسه فى الحزن، ولما يجيلى مود البكاء مش بحب أستسلم له».

وتحدثت دنيا عن أحد المواقف التى أعادت إليها ذكريات والديها خلال عملها الأخير «روكى الغلابة»، قائلة: «بيحصلى مواقف فى الشغل، فى آخر فيلم ليا روكى الغلابة كانت أختى إيمى جايالى ضيفة فى الفيلم، وده كان أول مرة نشارك فى حاجة بعد رحيل والدينا».

وتابعت: «كنا متعودين فى أى عمل لما بنعمله، أنا أو إيمى أختى، بابا أو ماما لازم ييجوا ضيوف فى العمل. وهى جت إيمى، ولما شوفتها فجأة جالى عياط مش طبيعى، وبفتكر بقى بابا وماما لما كانوا بيجولنا».