وجّهت الإعلامية رضوى الشربيني رسالة دعم للمطربة شيرين عبدالوهاب، بعد الجدل الكبير الذي حدث عقب حفلها في ختام مهرجان «موازين».

رضوى ظهرت في برنامجها «هي وبس» وهي تعبّر عن حزنها، قائلة: «الناس مش بس زعلانة منك، لأ، الناس زعلانين عليكي، على كل الأغاني اللي كانت سند لبنات كتير، وأنا واحدة منهم».

وأضافت: «إنتي كنتي دايمًا رمز القوة، صوت بيقول للستات يحبوا نفسهم ويقفوا على رجليهم، وفجأة لقيناك بتبعدي عن الصورة دي حتى لو وقعتي، إنتي أقوى من أي موقف، حتى لو كان صعب».

رضوى كملت كلامها بنبرة فيها عتاب ومحبة، وقالت: «إنتي اللي قولتي (أنا كتير، أنا كل حاجة وعكسها)، وعندك رصيد من الأغاني عمره ما كان مجرد فن، ده كان طوق نجاة لناس كتير. عشان كده إحنا موجوعين، لأن غلطة واحدة — سواء كانت في اختيار شخص، أو شغل، أو ناس حواليكي — ممكن تكسّر الصورة دي كلها».

واختتمت حديثها برسالة واضحة: «بلاش تسمعي للناس اللي بيشدّوكي لتحت، اسمعي اللي بيحاولوا يطلعوكي من اللي إنتي فيه، أنتي شيرين، النجمة اللي كانت كل بنوتة بتتفرج عليها تقول: أنا عايزة أبقى كده كفاية كده.. لو اللي حوالينا بيأذونا، حتى لو كانوا قريبين، يبقى لازم نحب نفسنا الأول، أنتي نص أغانيكي عن ده».