شنّت الفنانة والإعلامية سارة نخلة هجومًا قويًا على الفنانة حلا شيحة، متهمة إياها باستخدام الحجاب كوسيلة لجذب الأنظار، وتشويه صورته كرمز ديني.

قالت نخلة في إحدى البرامج:"  بيحصل ده مش طبيعي.. كل سنة ونص بنشوف نفس القصة، تتحجب، تتجوز، تختفي، ترجع، تقلع الحجاب، وترجع تمثل. الحجاب مش موضة ولا وسيلة للترند، دي حاجة أكبر وأعمق بكتير".

تابعت نخلة حديثها:" أنا مش هعلم الناس الحجاب ولا الالتزام، لكن من حقي أتكلم لما يتحول الحجاب لأداة يتم خلعها وارتداؤها كلما تغيرت الظروف الشخصية،دي المرة التالتة، وده مش طبيعي. المشكلة مش في لبسك، لكن في الرسائل اللي بتوصليها للناس، وخاصة البنات الصغيرين اللي ممكن يتلخبطوا بسبب اللي بيشوفوه".

استطردت سارة:"لما تقرري تتحجبي، لازم تلتزمي. مش كل ما الظروف تتغير، نرجع نخلع الحجاب ونطلع نبرر بآيات قرآنية وكأن الناس هي اللي ظلمتك. الحقيقة إنك بتظلمي نفسك وبترسخي صورة سلبية جدا عن فكرة الالتزام،هو إيه اللي بيحصل؟ ليه الاضطراب ده؟ لو كل مرة هتطلعي ترند عشان لبستي أو قلعتي الحجاب، يبقى إحنا بنتكلم عن شهرة على حساب رمز ديني مش لعبة".

اختتمت سارة حديثها:" مشكلتي مش مع حجابك، مشكلتي إنك بتستخدميه كأداة للفت الانتباه، وكل مرة بترجعي بنفس الطريقة. لو صدقتك تاني، أبقى أنا الغلطانة. وربنا يهديكي، ونتمنى تكون التالتة تابتة فعلا".

يذكر أن الفنانة والإعلامية السورية سارة نخلة كانت قد انفصلت عن الفنان المصري أحمد عبد الله محمود في عام 2018 بعد سلسلة من الأزمات بينهما والتي وصلت إلى رفع نخلة دعوى قضائية على زوجها تتهمه بالتعدي بالضرب عليها، وبالفعل صدر حكم ضده بالحبس.