خلال المؤتمر الصحافي لفيلم "ليه تعيشها لوحدك" الذي عرض ضمن فعاليات مهرجان المركز الكاثوليكي، كشف الفنان شريف منير عن رأيه فيما لو قررت ابنته الزواج من شخص أكبر منها في السن، موضحًا: "لو بنتي فجأة قالت لي أنا هتجوز واحد فيه فرق كبير بيني وبينه في السن، ممكن أوافق لأن دلوقتي بقى فيه عيال تافهة كتير وبرضه فيه بنات مش قد المسئولية وبيفكروا في الفستان والفرح بس".
أوضح الفنان شريف منير رأيه عن الفيلم قائلا:" أولا أنا بشكر كل الناس اللي اتفرجت على الفيلم، ثانيًا أنا ببقي سعيد وأنا شايف عرض فيلم ليا في مهرجان المركز الكاثوليكي للسينما لأنه عريق وشاف نجوم كبار جدا".

تابع منير حديثه:" المخرج حسام الجوهري أول ما عرض عليا الدور كنت متخوف شوية، بس لما قعدت معاه واتكلمت حسيت بهدوء شوية، وخالد الصاوي ده بعتبره قامة كبيرة وممثل تقيل أوي، وعنده ثقة في نفسه وكان شرف كبير ليا أني أتعاون معاه، والصراحة اتولدت بينا كيميا كبيرة وهي كانت موجودة من زمان، واحنا قعدنا عملنا بروفات ترابيزة كتيرة، واختلافنا كتير واتوافقنا على حاجات كتير جدا".
استطرد منير حديثه:" انا لما شوفت محمد رضوان في موضوع عائلي، أنا عشقته، راجل بيمثل وايديه سايبة كده، وراجل مظبوط في مواعيده، ويمكن نجوميته جت متأخرة بس خير، المجتمع ممكن يكون يشوف علاقتي في الفيلم مع سلمي أبو ضيف خيانة لخالد الصاوي، بس المشاعر والحب ملهمش كبير، وانا اتبسطت بالفيلم والشيء اللي زعلني إني مشوفتش دعاية بحجم التعب اللي تعبناه، ولكن بعد عرض الفيلم على المنصات عوضني شوية بإحساسي أن الفيلم متشافش، خاصة وأن الفيلم كان الأعلى مشاهدة على المنصة اللي اتعرض عليها".
كان قد غاب شريف منير عن الموسم الرمضاني الماضي وكان آخر أعماله مسلسل وبقينا اتنين، تأليف أماني التونسي وإخراج طارق رفعت وشارك في العمل كل من يوسف عثمان، رانيا يوسف، عمرو وهبة، تامر فرج، ميمي جمال، مروة عبد المنعم وآخرين.