أطلقت المغنية الشابة ماس محمد رحيم أولى أغنيات ألبومها الجديد، التي تحمل عنوان "ضيعتني"، من كلمات وألحان والدها الموسيقار الراحل محمد رحيم، وتوزيع موسيقي كريم أسامة.

أصدرت ماس بيانا موضحه كواليس أغنيتها الجديدة قائلة:" والدي الفنان محمد رحيم هو اللي اختار لي أغنيات الألبوم ومن بينها أغنية ضيعتني، وهى قريبة جدًا من قلبي، ولحنها مفاجأة فهو قديم لحنه والدي في سن الشباب، واللحن موجود فيه إحساسه وتركيبته المعروفة في الألحان، والدي كان حريص على عمل كل أغنية في الألبوم حالة خاصة وشبهي، وشايف إن أنا بس اللي هقدر أقدمها، بشخصيتي وبطريقتي وبأسلوبي، وده طبعا زي ما اتعودنا منه، مع اكتشافه لأي موهبة جديدة، بيرسم لها طريقها في الغناء، وأمثلة كثيرة قدمها بالشكل ده ومنهم الفنانة روبي".

استطردت ماس حديثها:" اختارنا سوى أغنية ضيعتنى، وهي شبهي زي ما كان بيقول، والأغنية مش حزينة، ومعناها جميل، وتتخطى حاجز العنوان، وكل أغنية في الألبوم لها قصة وشخصية وموضوع مختلف، وأنا بقدم الألبوم بكل فخر مش علشان نفسى، ولكن علشان والدي، لأن أنا شايفة اللي قدمه رحيم مش قليل، لأنه قدر يغير شكل الموسيقى في الوطن العربي على مدار 30 عاما،أنا بدأت حب الموسيقى وعمري 5 سنين، وكنت بحس بوالدي والأجواء اللي كلها مزيكا، ده غير الجينات اللي توارثتها عنه، وكنت بكتب وألحن، وكان والدى بيسمعها وبيعجب بها، ولما وصلت إلى 8 سنين بدأت أركب الهارمونى لوحدي- تركيب الهارموني في الموسيقى هو فن تنسيق الأصوات المختلفة معًا في وقت واحد لخلق تأثير موسيقي متناغم- والموضوع ده لفت انتباهه جدا وعرف إني موهوبة، وبدأ في تبني موهبتي، بتعليمي العزف على الآلات الموسيقية مثل البيانو والجيتار، وكنا بنتكلم مع بعض بلغة المزيكا، لو هو عاوز يوصل لي إحساس معين أو العكس لو أنا عاوزة أوصل له إحساس خاص، كنا بنغني لبعض، كان صديقي وصاحبي وكان معايا في كل حاجة".

أنهت ماس حديثها:" أنا شايفة التأثير اللي عمله رحيم لازم يستمر، ويفضل موجود، ونسمع منه الجديد، اللي احنا عرفناه من أعماله نزل، لكن لسه في كمان حاجات ومفاجآت كتيرة الناس لسه ماتعرفهاش هتنزل مع الوقت، موهبته الفنية بتتعدى الوصف، حياته كلها مزيكا وأنا بالتبعية غصب عنى اتأثرت بيه جدا والناس كلها بتقول إنى شبه والدي، من وأنا صغيرة بذاكره، وكل تفاصيله كانت ملهمة بالنسبة لى، ورسالته وطريقة تعبيره عن نفسه كانت بتبهرنى وبتخطفنى، ومن غير ما احس مشيت فى طريق المزيكا بالفطرة، شرف كبير ليا وباحمد ربنا كل يوم إنه خلانى بنته وخلاه أبويا، وأتمنى إن أغنية ضيعتني وجميع أغنيات الألبوم اللي هتنزل تعجب الجمهور".

تأتي كلمات أغنية "ضيعتنى":

"ضيعتني منك لله

و جرحتني منك لله

خليتني احزن على اللي فات

وأندم على قلبي و هواه

مش عيب اقول اني اتخدعت

او اني ضيعت لما انت بيعت

هبدا حياتي من تاني عادي

ـما اللي جاي سيباه لله

و اذا كان اللي فات من عمري

كنت عاشرتك فيه

يبقى اكيد الجاي من عمري هنسى غرامك بيه

و اذا كان اللي فات من عمري

كنت عاشرتك فيه

يبقى اكيد الجاي من عمري هنسى غرامك بيه

و انا هندم ليه و اصبر على ايه

ما صبرت تعبت يا ناس من قولة الـ اه من قوله الـ اه

و اذا كان الي فات من عمري

يبقى اكيد الجاي من عمري

و انا هندم ليه و اصبر على ايه

ما صبرت تعبت يا ناس من قولة ال اه من قوله ال اه

ضيعتني منك لله

و جرحتني منك لله

خليتني احزن على الي فات

و اندم على قلبي و هواه".