كتبت: صافيناز إبراهيم قالت المذيعة مي حلمي إنها تعتبر نفسها مخيرة في قراراتها، بدليل تخليها عن وظيفة مستقرة براتب كبير من أجل تحقيق حلمها بالعمل كمذيعة. وأضافت خلال حوارها في برنامج "بالمايك والقلم": "أنا علشان أبقى مذيعة تخليت عن شغل في شركة كبيرة جدا مقرها الإمارات بمرتب كبير، بدأت فيها وأنا عمري 17 سنة بعد تخرجي من الجامعة، وصاحب الشركة ساعتها قاللي إنت سايبة الشغل والمركز علشان مستقبل مجهول وعندت أكتر". وتابعت: "كان ممكن حد غيري يخاف، أنا سيبت راتب بالدولار وسفر دبي كل 6 شهور علشان شغلانة الأحلام، ومكنتش عارفة هيبقى عندي مرتب ولا لأ، وهنجح ولا لأ، وهعيش نفس العيشة ولا لأ، يبقى أنا مخيرة واخترت أجازف في المجهول، ويوم ما قعدت على المايك حلفت عمري ما أسيبه". يذكر أن مي حلمي وجهت مؤخرا رسالة غاضبة إلى خبيرة التوقعات ليلى عبد اللطيف، بعد خسارة النادي الأهلي أمام الزمالك مساء الجمعة في مباراة لقب السوبر الإفريقي، على عكس توقعها السابق لنتيجة المباراة. ونشرت مي حلمي عبر حسابها الرسمي في موقع التواصل الاجتماعي إنستجرام مقطع فيديو قالت فيه: "كلمة بعد الخسارة للست الجميلة اللطيفة ليلى عبد اللطيف، ما تتكلميش في الكورة تاني، أو روحي علقي على ريال مدريد أو برشلونة، وبلاش تجيبي سيرة الأهلي، أو روحي توقعي مين هيضرب مين، والكلام اللي إنتي بتطلعي حافظاه". وأضافت مي حلمي في الفيديو: "كل ما تجيبي سيرة الأهلي يتنحس، وكل ما تتوقعي للأهلي يكسب يتنيل ويتعك، مالكيش دعوة بالكورة وخليكي في سكتك وسيبينا في سكتنا، مش قلت الأهلي هيبدع؟ أهو بدّع يا اختي".