كتبت : مريم يعقوب
ردت الإعلامية داليا المدبولي، على ادعاءات المنتج أحمد السبكي بشأن فبركة تصريحاته عن الفنانة ياسمين صبري التي أكد فيها أنها لا تستطيع تحمل بطولة عمل فني بمفردها.
تصريحات المنتج أحمد السبكي عن الفنانة ياسمين صبري
وأوضحت داليا، في مداخلة هاتفية مع الإعلامية نهال طايل، في برنامج «تفاصيل»، المذاع عبر شاشة قناة صدى البلد، أن تصريحات السبكي عنها قد تضر سمعتها الإعلامية، قائلة: «الحقيقة أنا مستاءة جدًا بعد تصريحات أحمد السبكي واتهامه ليا أني فبركت الكلام اللي قاله على الفنانة الجميلة ياسمين صبري، لأن أنا لا فبركت ولا أي كلمة قالها ليا دخل فيها».
وأضافت: «كل كلمة قالها طالعة من لسانه وكان مُصر عليه، ولما اتكلم عني وقال الست المذيعة غضبت من الكلمة أنا أستاذ إعلام وبدرس لطلابي إزاي الإعلام يكون صادق، ده يسيء ليا أنا بشكل كبير».
وتابعت: «الحكاية إني بعمل بودكاست وبجيب فيه النجوم في مجالهم وأنا أكن كل الاحترام للمنتج أحمد السبكي وشايفة أنه راجل مؤثر في مجاله وقررت أعمل معاه البودكاست، وسألته سؤال مباشر إيه رأيك في النجمة ياسمين صبري؟، هو كان مُصر إنها متشيلش نص فيلم، وأنا حاولت إني أرفع عنه الحرج وأغير في كلامه علشان ميندمش عليه بعد كده ولكنه كان مُصر».
واختتمت: «قولتله ليه بتقول عليها متشيلش نص فيلم؟ قالي متنفعش، قولتله طيب مين اللي يشيل، قالي أسماء 3 نجوم وأن هما دول اللي بيعرفوا يمثلوا، وبعد كده الحاج أحمد بعتلي أشيل الفيديوهات لأن تصريح ياسمين صبري هيزعلها منه، وأنا بالفعل شيلت الفيديوهات من عندي وحاولت افتح القناة بتاعتي وقولت بلاش مشاكل ويمكن هو ندم على تصريحاته، وأنا اتضريت جدا من الموضوع ده».
حقيقة فبركة تصريحات السبكي عن ياسمين صبري
من جانبه، أكد المنتج أحمد السبكي، أن تصريحاته عن الفنانة ياسمين صبري مفبركة وليس لها أي أساس من الصحة.
وقال السبكي في مداخلة هاتفية بأحد البرامج التليفزيونية: «أنا مقولتش أن ياسمين متقدرش تشيل نص فيلم، كل الكلام ده مفبرك»، مؤكدا أنه تم عمل مونتاج لحديثه خلال أحد اللقاءات التلفزيونية لركوب التريند على حسابه.
وأضاف أحمد السبكي: تصريحي عن ياسمين صبري غير صحيح، هو أنا أطول أشتغل معاها.. مفيش الكلام ده ودي حبيبتنا، واشتغلت معانا قبل كده في فيلم الديزل مع محمد رمضان وهي نجمة وبطلة.
أحدث التعليقات