كتبت : أميرة خالد
كشف الفنان صبري فواز عن رأيه في الفنان محمد سلام قائلا إنه «من أنضف وأنقى الناس»، على حد تعبيره.
ونشر صبري فواز منشورًا عبر صفحته الشخصية على فيسبوك، جاء فيه: «محمد سلام من أنضف وأنقى الناس اللي ممكن تشوفهم في حياتك، وكل الناس بتحبه»، وذلك بعد اعتذار سلام عن عدم السفر إلى السعودية لعرض مسرحية ضمن موسم الرياض، تعاطفًا مع ما يمر به سكان قطاع غزة من عدوان إسرائيلي غاشم.
وأعلن الفنان محمد سلام اعتذاره عن عدم السفر للسعودية للتقديم مسرحية زواج اصطناعي في موسم الرياض بسبب أحداث فلسطين.
وكشف عن تفاصيل هذا الأمر في فيديو له على إنستجرام قائلًا: «السلام عليكم ورحمة الله إن شاء الله المفروض أسافر الرياض عشان أعرض مسرحية زواج اصطناعي في موسم الرياض والمفروض إنها مسرحية كوميدية وفيها أغاني واستعراضات والمفروض إننا نعرض إن شاء لله يوم 30 أكتوبر».
وتابع: «هنعرض في وسط الأحداث اللي بتحصل في غزة فأنا مش متخيل إني هروح أعمل مسرحية وأهزر وأرقص وإخواتنا في فلسطين عمالين يتقتلوا ويدبحوا ومفيش حاجة بتحصلهم».
وأوضح: «أنا مش هقدر أسافر طبعًا وليه بقول الكلام ده في آخر لحظة المفروض إني أسافر بكره إن شاء الله لأني كنت على أمل إن الموسم يتلغي أو يتأجل مثل مهرجانات الجونة والقاهرة أو الموضوع يهدى في فلسطين، ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل، فأنا إزاي أروح اعرض وناس بتموت في فلسطين، حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وأرقص، فأنا بعتذر عن عدم المشاركة في موسم الرياض واللي بيحصل في فلسطين قضية كل مسلم، وواجب على كل مسلم، فأنا مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟ هقول في وقت الأحداث في فلسطين أنا كنت بعمل مسرحية كوميدية وبرقص وأغني؟!، فأنا مش هقدر أعمل كده».
واستطرد: «كان عندي الموسم يتأجل أو يتلغى، فأنا مش هقدر أشارك في المهرجان ده وحابب أقول إني كنت في مشكلة مش عارف أسافر ولا أعمل إيه؟ والتمثيل هو أكل عيشي، لكن لو مسافرتش هل هموت من الجوع؟ بالتأكيد لا».
أحدث التعليقات