كتبت: أميرة خالد
تصدر مسلسل بطن الحوت تريند محرك البحث جوجل ومنصات التواصل الاجتماعي خلال الساعات القليلة الماضية، بعد ظهور التيك توكر «كروان مشاكل» في أحد المشاهد مما جعل هذا الأمر ان يثير جدلًا كبيرا على جميع مواقع التواصل الاجتماعي، وانهالت العديد من تعليقات الجمهور على ظهور التيك توكر كروان مشاكل بالعمل ما بين مؤيد ومعارض.
شن الجمهور هجوما على صناع مسلسل بطن الحوت، بسبب ظهور كروان مشاكل، إذ كتب متابع على الفيس بوك: أنا خدت صدمة.. أبو أيمن بالأنتر!.كتب متابع آخر: في ظل إن في صراع بين اللي هيشتغل نقابي ولا خارج النقابة، مسلسل في بطن الحوت اللي بيضم أهم نجوم في مصر زي محمد فراج وباسم سمرة، جايبين كروان مشاكل.
كتبت أخرى: ويقولك الفن بيخرب ليه، ما هو من الأشكال دي، أنا مكنتش مصدقة عنيا والله، يعنى واحد زى ده دوره ايه فى الحياه أصلا؟! تيك توك وفيديوهات تافهة متتشافش، ازاي يوصل لهنا، في حين إن عندنا جيل كامل من الشباب محتاج الدعم، حتى لو الدور كان مشهد واحد، ليه كده، كروان مشاكل الحاجة الوحيدة اللي سببتلي استياء في مسلسل بطن الحوت، ويا ألف خسارة لو مستوى اختيار الممثلين الشباب هيكون بالشكل ده الفتره الجاية.
علق ايضا المخرج يسري نصر الله على المسلسل عبر الفيسبوك قائلاً : “لفت نظري إن ناس إن كذا حد سألني عن رأيي في كروان مشاكل في مسلسل “بطن الحوت”.. أنا ما كنتش عارف مين كروان مشاكل أصلا ومش من متابعين ترندات تيك توك وإنستغرام. سألت وعرفت إنه طالع ف مشهدين في الحلقة التانية. مشهدين عجبوني جدا لإن فيهم حاجة “حقيقية”.
تابع نصرالله حديثه: “حاجة بحبها لما أشوف شخصية ثانوية ويبقى انطباعي إنها حقيقية ومش مجرد حد بييجي “يدلي بأقواله”، حد بيحسسني إن وراه حكاية وحياة ماعرفهاش وغالبا مش ح اعرفها بس نفسي أعرفها، ساعات كمخرج بادور على ده. بادور على “وش” مش بيمثل بس هو ببساطة حقيقي.
يذكر أنه قرر الدكتور اشرف ذكي نقيب المهن التمثيلية تغريم الشركة المنتجة لمسلسل بطن الحوت مبلغ 100 ألف جنيه غرامة لإشراك التيك توكر كروان مشاكل ، بالإضافة إلى تقديم شكوى ضد مخرج العمل فى نقابة المهن السينمائية.
يشارك في بطولة المسلسل كل من محمد فراج، باسم سمرة، أسماء أبو اليزيد، سماح أنور، يوسف عثمان، هاجر السراج، عبدالعزيز مخيون، وعصام عمر. وهو من تأليف وإخراج أحمد فوزي صالح.
أحدث التعليقات