كتبت : مريم يعقوب
حل الفنان مصطفى ابو سريع ضيفا عبر برنامج «أسرار النجوم» مع إنجي على و كشف عن أسباب رفضه المشاركة في مسرح مصر.
قال الفنان مصطفى ابو سريع:” أنا كنت بعمل مسرحية في مسرح الدولة اسمها «رجل بلا أجندة» وأستاذ أشرف عبدالباقي كان صديق ليا وبيدعمني، حصل أن تجربة «مسرح مصر» هتروح mbc مصر، وحصل حاجات مش لطيفة أن في ناس من التجربة خانوا التجربة، وبدأوا يطلبوا ياخدوا فلوس أكتر، كان أستاذ أشرف عايز يدعم الصفوف لأنه متسامح لدرجة أنه مش هيلوم حد لو مشي، وطلع ليا عربون وأنا في جيبي مفيش فلوس، لكن قلت له مش هقدر، قالي ليه يا ابني إنت غبي؟ قلت له هي تجربتهم ونجحوا فيها ومش هينفع أنا أبقى عنصر زيادة فيها”.
استطرد ابو سريع حديثه:” أنا كنت شايف أنها تجربة ناجحة أنا مبدأتش نجاحها أنا هبقى دخيل نجاح، أنا روحت اتفرجت وحاببهم سوا،أنا بحترم أستاذ أشرف عبدالباقي بشكل خاص وبحترم تجربته ومشواره ومن الناس لما اشتغلت معاه في «راجل وست ستات» كانت تعتبر من الحلقات اللي أول مرة أخد مساحة، من غير أفورة أنا سجدت في اللوكيشن بعد ما خلصت تصوير، لما لقيت نجم زي أشرف عبدالباقي عايز كل اللي حواليه حلوين أوي وبيفكر معايا وممكن أقوله إفيه يعجبه ويقولي إفيه أقوله”.
اختتم مصطفى ابو سريع قائلا:” تجربة مسرح مصر، أنا بحترم كل الأساتذة ورأيهم فيها، لكن بلاش نقول دا مسرح ومش مسرح طالما فيه جمهور وفي خشبة مسرح وناس رايحه تنبسط يبقى مسرح، شكرا لأشرف عبدالباقي عمل مسرح في وقت مكنش فيه ورجع الجمهور وطلع فنانين كلهم حبايبي وأصدقائي”.
يذكر أن مصطفى أبوسريع لفت الأنظار في شهر رمضان الماضي، من خلال دور عاطف في مسلسل «العتاولة».
ومسلسل «العتاولة» من بطولة أحمد السقا، طارق لطفي، باسم سمرة، زينة، صلاح عبدالله، مي كساب، ميمي جمال، فريدة سيف النصر وآخرين. تأليف هشام هلال، وإخراج أحمد خالد موسى.
أحدث التعليقات