كتبت : أميرة خالد
قال الناقد أندرو محسن إن مسلسل صلة رحم يقدم تناول مميز لعملية تأجير الرحم ومحاولة تحليلها للكاتب محمد هشام عبية، مشيرا إلى أن هناك محاولة واضحة لتقديم شخصيات بها توازن بين الجانبين «الكويس والوحش».
وأضاف أندرو محسن عبر «فيس بوك»: «عجباني شخصية الدكتور خالد (محمد جمعة) في مسلسل صلة رحم. فيه محاولة واضحة في المسلسل كله لصناعة شخصيات فيها توازن بين الجانب الكويس والجانب الوحش، مع تساؤلات طول الوقت عن مفهوم الصح من الغلط، سواء في حكم المجتمع أو الدين أو الضمير، ودي من أكتر الحاجات المميزة هنا. ده واضح بشكل أكبر في شخصية دكتور خالد، الظهور الأول ليه بيدي انطباع إن ده شخص شرير بلا أي مبادئ، بيتاجر بمهنته وباحتياجات الناس، لكن بعد كده الشكل ده بيتغير بطريقة حلوه وبيبان إن الدكتور ده عنده وجهة نظر وعنده حدود ومبادئ، صحيح ممكن نختلف معاها، لكنها موجودة وقابلة للنقاش».
وتابع:«الأحلى كمان هو التحول اللي بيحصل في علاقته مع الدكتور حسام (إياد نصار). بعد ما كان حسام بيحتقره، بقى بيطلب مساعدته، وبعد ما كان بيشوف إن اللي بيعمله خالد ده غير أخلاقي، بقى هو نفسه يدور على مبررات لإتمام عملية إيجار الرحم، لما الموضوع بقى بيمسه هو شخصيًا. هنا بنلاقي إن الدكتور خالد بقى هو اللي بيدين حسام، ومش موافق على اللي بيعمله، وشايفه بيتجاوز الحدود المسموح بيها، وده بيخلي المشاهد يفكر، هي فين الحدود دي؟ واتحطت ازاي؟ ومين حكمه أدق؟ ومن ناحية تانيه فيه تساؤل مهم عن مفهوم المبادئ والإدانة: إلى أي حد ممكن تلتزم بمبادئك لو المبادئ دي بتتعارض بشكل كبير مع مصالحك؟».
واستكمل:«تناول مميز في سيناريو محمد هشام عبية، اللي مش بيقف بشكل مباشر عند عملية تأجير الرحم وبيحاول يحللها (وده موضوع كبير في حد ذاته)، لكنه بيستخدمها لمناقشة أفكار أكبر».
أحدث التعليقات