كتبت : مريم يعقوب

تحدث المطرب وائل الفشني، عن ردود الفعل التي استقبلها وكواليس أغنية تتر مسلسل«الحشاشين»، حيث قال في رسالة صوتية لبرنامج «ET بالعربي»: «طبعًا كواليس مسلسل الحشاشين كانت من أصعب الكواليس اللي شفتها يعني، لأن كان المسلسل كبير جدًا، المزيكا قوية جدًا للأستاذ الكبير أمين أبوحافة، وكان شرف ليّا طبعاً الاشتراك في تتر وعمل كبير زي ده».

وأضاف «الفشني»: «الناس كلها عارفة طبعاً العظمة اللي بتحصل في القصة، لساني عاجز عن إني أقول حاجة غير أن هي عظمة فعلاً يعني، عظمة في الدراما بتحصل فكان شرف كبير جداً جداً ليا إن أنا أكون متواجد في عمل زي ده».

 

وتابع وائل الفشني: «أنا أغني بالطريقة اللي غنيت بيها دي، دي طريقة أنا بقول إن ربنا صرفها لي، اللي هي ما بين الحدو وما بين الابتهال، من ساعة واحة الغروب يمكن هي الطريقة دي، فطبعاً الشركة المنتجة باشكر الشركة المتحدة وسينرچي لاختياري للعمل الكبير ده، شرف كبير جداً ليا وأشكرهم جميعاً، لأن كان الموضوع مش سهل خالص على أي مزيكاتي أو أي مطرب».

 

واستكمل قائلاً: «ابتدينا نشتغل على التتر بالطريقة دي، طبعًا الأستاذ الكبير الموسيقار أمين أبوحافة هو بعتلي تخيل وتصور، وفي التخيل والتصور ده لقيته هو مذاكرني جداً جداً، هو فنان عالمي وأشكره لفهمه لصوتي ولأنه حاطني بالطريقة دي فأشكره جداً».

وتابع «أشكر اللي فكر في وائل الفشني، يبدو إنه كان قرار مدروس أوي يعني، فالحمد لله أولًا وأخيراً وأقول إن ربنا وفقني الحمد لله، لكن كانت الكواليس صعبة جدًا في وقت أنت بتغني عمل فيه أوركسترا، الموضوع صعب جداً، خايف تخبط في الهارموني الموجودة، الموضوع كان صعب إني أفسره، بس أي فنان أو أي موسيقار هيبقى فاهم أنا باقول إيه ففي الأول وفي الآخر هو توفيق من ربنا يعني والحمد لله رب العالمين».