كتبت: مريم يعقوب

دافع الإعلامي باسم يوسف، عن النجم المصري العالمي محمد صلاح، إثر دعمه للقضية الفلسطينية بمقطع الفيديو نشره صلاح ، وحقق تفاعلا غير مسبوق.

نشر باسم يوسف صورة له برفقة صلاح وعلق قائلا: تحديث للناس اللي قرأت البوست، لو ما قريتش معلش اقرأ البوست وبعدين ارجع هنا: انتم مش عارفين الدنيا في العالم برة العالم العربي كانت مشحونة قد إيه، صورة تانية خاااااااااااااالص غير اللي واصلة للعالم العربي ، الرواية المتصدرة كانت مرعبة وكان من المستحيل الدفاع عنها تحت أي مسمى لدرجة إن مجرد التعاطف مع المدنيين في حد ذاته تساوي إنك موافق على دبح الأطفال، أنا شخصيا صدقت وعشان كده عملت الفيديو إياه بتاع الصورة اللي هنا في الغرب، فاكرينه؟ انزلوا الصفحة دوروا عليه، الناس كانت بتتهكم عليا وتقولي إزاي تصدق كده، تاني انتم مش عارفين الصورة هنا إيه. في إنجلترا الصورة مشحونة احترمت أمريكا. محمد صلاح لو كان طلع وقال الرسالة اللي في الفيديو اللي مش عاجب ده كان زمانه اندبح”.

استطرد باسم حديثه:” طب اشمعنى انت يا باسم عملت كده؟ والله دي مخاطرتي وده قراري وأنا مش عارف ظروف الناس، وكتير، كتير قوي، عدى عليا أوقات وسكت عشان الظروف قوية، قوية قوي، اللي بيمر بظروف صعبة بيقدر، اللي بيتفرج من بعيد سهل يزايد، لو أنت عملت حاجة عظيمة وضحيت، برافو عليك. أنت عظيم.. انت ملهم، لكن لو فعلا مريت بالتجربة انت من جواك عمرك ما حتفرضها على حد، يا أخي ده حتى في الإنجيل بتناجي ربنا وتدعيه: ولا تدخلنا في التجربة. مش: ونجنا من التجربة. لا بلاش تدخلنا خالص. عشان احنا ضعاف. احنا صغيرين قوي. قوي. الواحد بيعمل الحاجة عشان يرضي نفسه مش عشان يتنطط بيها على خلق الله ، أنا شفت الصورة دي في كذا صفحة مع تعليق: محمد صلاح متصور مع فخر العرب، ده غير بوستات تانية كتيرة جدا يا اما بتقارن لقائي مع الفيديو بتاعه أو بتقلل وتهمش وتتريق على فيديو صلاح ، مقارنة فيديو صلاح باللقاء بتاعي هو ظلم بيِّن، لأن الكلام مش شغلة صلاح ولأن طلاقة اللغة مش شغلة صلاح، لا صلاح هيعرف يتكلم ويحاور زيي ولا أنا أقدر ألعب كورة زي صلاح.

استرسل يوسف حديثه: صلاح بالإنجليزي المكسر والأداء “الفلات” أو المخطوف زي ما ناس وصفته، الأداء الوحش ده عمل ملايين التفاعلات والمشاهدات.. كونه بقى أن الكلام مايع مفيش إدانة واضحة ومسك العصاية من النص وقصف الجبهات مش دور صلاح خالص وأصلًا هو فيديو غير موجه لينا وربَّ فيديو بسيط من غير عياط ومن غير نرفزة ومن غير شتيمة ومن غير إدانات وشجب وعياط ودموع لكن يوصل بره ويغير صوت واحد ده أبرك بكتير ، واحد زي صلاح، ملهم لأجيال كتيرة قصة كفاح غير مسبوقة، راجل بيتبرع في السر أكتر من العلن وفاتح بيوت أنا وأنتم مش عارفين عددها، واحد زي ده نخسره ليه؟ عشان ما شفاش غليلك في قضية بقالها ييجي ميت سنة أعتى الأنظمة وأكبر الدول فشلوا فيها؟ اتأخر؟ يا سيدي المهم أنه وصل، مش قوي بما فيه الكفاية؟ آه بالنسبة لك، لكن بالنسبة لناس كتيرة قوي قوي قوي دي ممكن يكون أول مرة يسمعوا فيها عن القضية، والدنيا بره غير خالص الوطن العربي عندنا بس ده له بوست لوحده.