كتبت: مريم يعقوب
قدم باسم سمرة دور ضابط تحقيقات في مسلسل سفاح الجيزة من بطولة أحمد فهمي، والذي انتهى عرضه مؤخرًا عبر منصة شاهد Vip وحقق نجاحًا كبيرًا ونسب مشاهدة عالية.
تحدث الفنان باسم سمرة عن كواليس مشاركته في مسلسل سفاح الجيزة قائلا:”المسلسل خد وقت في التحضير ومجهود كبير على الرغم من أنه 8 حلقات، ولكن خد مجهود كأننا بنعمل 30 حلقة، وكان فيه إخراج على أعلى مستوى وطاقم التمثيل كان على مستوى فوق الممتاز،الإخراج كان مختلف لأن هادي الباجوري اختار لوكيشنات في أماكن حقيقية مش استوديهات أو ديكور، وكان فيه مشاهد في مصر الجديدة وجري وسط المطبات والعربيات في مشاهدي مع أحمد فهمي، والتصوير في الخارجي بيكون صعب مش سهل ومحتاج إنتاج قوي بيقدر يسيطر على التصوير والحمد لله إحنا تعبنا والنهاية الصورة طالعة حلوة أوي والناس حاسة أن فيه حاجة مختلفة في العمل”.
أردف باسم سمرة مازحًا عن سبب نجاح المسلسل: سبب نجاح المسلسل إن أنا موجود ودي أقل حاجة عندي.
عبر سمرة عن حزنه الشديد من رأي الجمهور بأن شخصية السفاح كانت هى الأنسب له عن الدور الذي قام به، وهو دور الضابط الذي قدمه خلال العمل موضحا:”في ناس كتيرة قالت ليا إنت معملتش دور السفاح ليه؟، وكأنهم هما اللي بيختاروا ومفيش مخرج ومؤلف، ولو الدور ده كان إتعرض عليا من الأول مكنتش هوافق، وده علشان الدور مش مناسب ليا بعد ما كنت بعمل دور شعبي في (بابا المجال)، وبعدها على طول مش هينفع أعمل حاجة في نفس السكة، وده بخلاف إني كنت عاوز أقدم حاجة مختلفة واستمتع بيه، وأنا مش شغال بس علشان أبسط الناس وخلاص”.
يشار أن مسلسل “سفاح الجيزة” مأخوذ عن قصة حقيقية، وقام ببطولته مجموعة كبيرة من نجوم الفن أبرزهم “أحمد فهمي، وباسم سمرة، وركين سعد، وداليا شوقي، وحنان يوسف، وجيهان الشماشرجي، وهايدي خالد، وصلاح عبدالله، وإنجي أبو السعود”، وغيرهم الكثير
أحدث التعليقات