تقرير: مريم يعقوب

اعرب النجم تامر هجرس عن سعادته بالمشاركة في فيلم « شوجر دادى » برفقة النجوم ليلي علوي والفنان بيومي فؤاد والفنان الشاب مصطفي غريب.

جاء ذلك خلال تصريحاته الخاصة لـ«موقع هاى ميوزيك ».

وفي حديثة قال هجرس: شوجر دادي فيلم جميل جدا و قصته حلوة أوي و شدتني على طول واشاد بفريق العمل ككل بداية من الكاتب لؤي صادق و الاخراج محمود كريم  والإنتاج لشركة قوية مثل : نيو سنشيري

وأضاف، النجوم ليلي علوي و بيومي وحمدي مرغني و مصطفى و فرح و مي كل شخص مثل في هذا الفيلم انا فخور اني شاركت معاهم فيه و فخور بيهم و بحبهم جدا.

حرقت الدور بس انا فعلا طالع دكتور نفسى

وعن دوره بالفيلم قال مازحا : انا عامل دكتور نفسي طبعا متعرفوش الدور ده في الاول كده احنا حرقنا الفيلم بس هو بيطلع في الآخر دكتور نفساني و بيحاول يحل الموقف فى شوجر دادي اللي هو اتورط فيه شخصية بيومي فؤاد.

لما اتعرض عليا ورق مناسب انتهزت الفرصة

وكشف هجرس عن سر ابتعاده الفترة الماضية عن السينما قائلا: انا ابتعدت عن السينما بسبب ان الفترة السابقة كل  المعروض عليا مفيش فيه حاجة حلوة لكن أول لما جالي شوجر دادي انتهزت الفرصة و قولت خلاص انا هعمل الفيلم ده بدون أي تفكير اقتنعت على طول من أول قراءة للسيناريو بس قبل كده مكنش فيه حاجة مناسبه فكنت بعمل مسلسلات في رمضان بس.

مراتي لازم تحب حب الناس ليا وانا احب إعجاب الآخرين ليها

وبسؤاله عن التريند الاخير الخاص به مع زوجته وتصريحاته بشأنها كان رأيه، ان التريند أمر ايجابى بالنسبة له و لا يزعجه نهائيا واستكمل قائلا: تبقى حاجة حلوة و بيبقى مهم اوي للناس لما بتشوف و تركز، مش بس المانشيتات دي او التصريحات دي بتبقى فاهمه الموضوع اكتر وبتشوف ان الموضوع جميل.

وتابع،  انا عارف ان فيه نسبة طلاق عالية في مصر  الفترة الماضية وهذا سبب قوي ان انتهز الفرصه اني اقول المفروض ان نفتخر باللي بيشاركنا في حياتنا سواء الزوج او الزوجة مهم جدا  اننا نفتخر بيهم و نفتخر بالشخصية اللي احنا حبناها يعني لو واحدة ست حبت راجل ده علشان الثقة اللي فيه و انه راجل بمعنى الكلمة و انه بيدخل في مكان كله ستات بتبص عليه او مثلا رجاله بتبقى عايزة تكلمه مينفعش تطفيه و تخنقه و تمنعه من حاجات معينة هي اصلا حبيته عشانها و هو كذلك ايضا  لما بيدخل مكان و هو متجوز واحده جميله فيه ناس بتبصلها طبعا محدش هيعاكسها و هو واقف عشان راجل يعني معاها بيبصولها فطبعا لازم يبقى فيه ناس بتضايق انه فيه نظرة بتخليه لا متلبسيش متخرجيش متعمليش متتكلميش فمرة بعد التانيةخلاص بتطفى اللى قدامك

فهي لا عايزة تبصلك و لا انت عايز تبصلها وبتخلص بطلاق.

واوضح، ان نجاح العلاقة دايما الثقة اننا نثق في بعض و نعرف ان احنا لما بنحب حد لسبب فلازم نحب حب الناس فيه

احمد عز صوته حلو ومش عارف ليه مش بيغنى

وعند سؤاله عن بداياته مع النجم أحمد عز كموديل إعلانات قال:ذكريات حلوة جدا اشتغلت مع عز هو  موديل وكان عز بيشتغل أصلا مع اختي رانيا في اوتيل قبلها و اتعرفت عليه في الفندق في المكتب كان مكتبه جنب مكتب رانيا و بعدها دخل مجال الموديلينج و كان صوته حلو جدا كان دايما بيغني باك ستديج فكانت حلوة اوي ومش عارف ليه مبيغنيش اصلا في افلامه لأنه صوته حلو أوي بحبه جدا و بتمناله كل خير و هو ناجح و هو فعلا ده اللي يتقال عليه نجم بجد

شكراً للزعيم عادل امام على كل فرصة ادهالى

ووجهه الفنان تامر هجرس للزعيم عادل إمام كلمة قائلا: عادل إمام اقوله شكراً شكرآ على كل الفرص اللي انت بتديهالى و شرف ليا اني اشتغلت معاك مرتين يا زعيم يا جميل ربنا يحفظك و يحميك لينا

وفى نهاية حديثه وعد هجرس بأن كل القادم من الأعمال الفنية سوف يكون لايت وخفيف وذو طابع كوميدى يعجب الجمهور ويسعد قلبه ويرسم الابتسامه على وجهه.