أوضحت الفنانة الشابة أميرة أديب سبب ظهورها في فيديو تحدث فيه عن مرورها بفترة اكتئاب، مؤكدة أن هذا الاكتئاب لم يكن بفعل الانتقادات التي تتعرض لها بل لعوامل كثيرة مجتمعة.

صرحت  أميرة أديب قائلة :"أن النقد لا يزعجها ما يزعجها هو وجود أشخاص بداخلهم كم كبير من الكره".

تابعت اديب حديثها:" اللي ضايقني مش الانتقادات ولا التنمر من وأنا صغيرة وأنا مش مفهومة من وأنا صغيرة البنت اللي بتلبس اللي هي عايزاه وبتقول اللي عايزاه وأنا عندي أصحابي اللي فاهمني ومتقبلني، أنا في فترة في حياتي مريت بكذا تجربة وقعتني كان درس ورا درس حسيت إني فاتحة سنتر هيجوا ياخدوا دروس عندي، وكنت بتعب أوي عشان أقدم شيء فلاقي الناس بتشتمني، وناس من برا حطاني في مكانة عالية بس أنا اللي فارق معايا بلدي، كنت بتشتم كتير وكنت في علاقة مكانتش أحسن حاجة كان محسسني إني مش كويسة ومع الناس اللي بتكرهني صدقت إني مش كويسة ما أنا بني آدمة كنت متضايقة أن الناس مش بتحبي، أنا بحاول أقدم حاجة تخلي الناس تبتسم وتحب نفسها، كل حاجة بعملها هو شيء أنا حاسه بيه".

استرسلت أميرة اديب حديثها : "كان في سنتين هجوم كبير ومكنتش عايزة أظهر خالص كنت بخاف لما لقيت ناس بتقولي موتي نفسك وناس بتقولي إنتي قبيحة مع أن أنا مش فارق معايا، لما طلعت أتكلم عن الاكتئاب مكنتش بستعطف الناس دي كانت الحقيقة كنت بقول إني راجعة وعادي إن حد يجيله اكتئاب، وأنا مكتئبة كان نفسي أشوف حد بيقول إنه كان مكئتب وفاق منه، في فترة كنت مش بقبل شغل وقافلة على نفسي فكنت عايزة أقول إني تمام".

اختتمت اديب قائلة: "الشغلانة كانت مأثرة عليا كنت بسمع كتير لازم تعملي مناخيرك والدور دا مش هنديهولك لو حطيتي فيلر هناخدك، ناس تقول لازم تبقي أنانية ولازم تبقي قليلة الأدب كنت بسمع حاجات عكس تربيتي وفطرتي وأكيد كنت بتأثر بيها".

يأن أميرة أديب شاركت في السلسلة الوثائقية العالمية "Follow Her" التي تهدف لتقديم وتوثيق نماذج نسائية مؤثرة، ممثلةً مصر في هذا المشروع.

غابت أميرة أديب عن موسم دراما رمضان 2026، بينما كان آخر أعمالها في رمضان 2025 من خلال مسلسل "عايشة الدور" بطولة دنيا سمير غانم، نور محمود، رحاب الجمل، محمد ثروت، محمد كيلاني، سماء إبراهيم، وفدوى عابد.